මුදල් ව්යාපාර පනතේ විධිවිධාන අඛණ්ඩව උල්ලංඝනය කිරීම හේතුවෙන් නේෂන් ලංකා ෆිනෑන්ස් පී.එල්.සී (Nation Lanka Finance PLC) ආයතනයේ මුදල් ව්යාපාර බලපත්රය ඊයේ (ජුලි 03) සිට ක්රියාත්මක වන පරිදි අවලංගු කළ බව ශ්රී ලංකා මහ බැංකුව නිවේදනය කරයි .
ඒ අනුව බැංකු පනතේ ප්රතිපාදනවලට අනුකූලව මෙම සමාගම ඈවර කිරීමට කටයුතු කරන බව මහ බැංකුව නිකුත්කළ නිවේදනයේ සඳහන් වෙයි .
සමාගම මුහුණ දී තිබූ මූල්ය අර්බුද විසඳා ගැනීම සඳහා මීට පෙර විවිධ ව්යුහාත්මක විකල්ප කෙරෙහි අවධානය යොමු කර තිබුණ බවත්, ඒ යටතේ ශක්යතාවයෙන් යුත් ආයෝජකයින් ආකර්ෂණය කර ගැනීමටත්, දැනට ස්ථාපිත ස්ථාවර වාණිජ බැංකු හෝ මුදල් සමාගම් වෙතින් උනන්දුවක් දක්වන පාර්ශවයන් වෙත විවෘත ආරාධනා නිකුත් කිරීමටත් පියවර ගත් බව මහ බැංකුව සඳහන් කරයි.
කෙසේ වෙතත්, එම උත්සාහයන් ව්යර්ථ වීමත් සමඟ 2025 ජුලි 04 දින සිට නේෂන් ලංකා ෆිනෑන්ස් ආයතනය සම්බන්ධයෙන් විශේෂ නිරාකරණ ක්රියාමාර්ග ආරම්භ කෙරුණා.
ඒ අනුව එදින සිට බලපැවැත්වෙන පරිදි සමාගමේ සියලුම වත්කම්, මෙහෙයුම් සහ ව්යාපාරික කටයුතුවල සම්පූර්ණ පාලනය මෙන්ම සමාගම වෙනුවෙන් ව්යාපාර කටයුතු පවත්වාගෙන යාම සඳහා පී.ඩබ්ලිව්.ඩී.එන්.ආර්. රොද්රිගු පරිපාලකවරයා (Administrator) වශයෙන් පත් කිරීමටද මහ බැංකුව කටයුතු කර තිබුණි.
මෙම බලපත්රය අවලංගු කිරීමේ පියවරත් සමඟ, ආයතනයේ රක්ෂිත තැන්පත්කරුවන් වෙනුවෙන් වන්දි ගෙවීමේ ක්රියාවලිය ශ්රී ලංකා තැන්පතු රක්ෂණ යෝජනා ක්රමය (SLDIRS) මඟින් ආරම්භ කරනු ඇත.
එක් තැන්පත්කරුවෙකු වෙනුවෙන් උපරිමය රුපියල් 1,100,000ක් (ලක්ෂ එකොළහක්) දක්වා වන්දි මුදල් ගෙවීමට අවශ්ය පියවර ගන්නා බවත්, සමාගමේ බලපත්රය අවලංගු කරන දිනය වන විට, එක් එක් තැන්පත්කරු සතු සියලුම සුදුසුකම් ලත් තැන්පතු සහ ඒ සඳහා ලැබිය යුතු නොගෙවූ පොලී මුදල් එකතු කර ඒකාබද්ධ කිරීමෙන් පසු අවසන් වන්දි මුදල තීරණය කරනු ලබන බවත් එම නිවේදනයේ වැඩිදුරටත් දක්වා තිබෙනවා.
