ආන්දෝලනයට තුඩු දී ඇති ‘ට්රයිඩන්ට් කෙම්ෆාර්’ (Trident Chemphar) සමාගම විසින් මෙරටට එවනු ලැබූ තවත් ගල්අඟුරු නැව් දෙකක සාම්පල පරීක්ෂණවලින් අසමත් වී ඇති බව ආරංචි මාර්ග පවසයි.
මීට පෙර අවස්ථා තුනකදී ද මෙම සමාගම සැපයු ගල් අඟුරු ප්රමිතියෙන් තොර බව තහවුරු වූ අතර, ඒ අනුව මෙතෙක් එම සමාගම සැපයූ ගල්අඟුරු තොග අතුරින් පහක් ප්රමිතියෙන් තොර බව තහවුරු වී ඇත .
ගල්අඟුරු තොගවල ගුණාත්මකභාවය පරීක්ෂා කිරීම සඳහා ලක්විජය බලාගාරය විසින් පත් කරන ලද ‘කොටෙක්නා’ (Cotecna) නැමැති විද්යාගාරය මඟින් මෙම සාම්පල පරීක්ෂාව සිදු කර ඇත.
ටෙන්ඩර් පිරිවිතරයන්ට අනුව ගල් අඟුරුවල තාප ජනන ධාරිතාව GCV 5,900 ත් 6,150 ත් අතර මට්ටමක පැවතිය යුතුය. එහෙත් 12, 13 සහ 14 යන නැව්වලින් ගෙන ආ ගල්අඟුරු සාම්පලවල දළ තාප ජනන ධාරිතාව (GCV) 4,800 ට වඩා අඩු අගයක් ගෙන තිබේ.
ගල්අඟුරු තොගයක තාප ජනන ධාරිතාව අඩු වීම යනු විදුලි ඒකකයක් නිපදවීම සඳහා වැඩි ගල්අඟුරු ප්රමාණයක් දහනය කිරීමට සිදු වීමයි. සපයන ලද ගල්අඟුරු ප්රමිතියෙන් තොර වීම හේතුවෙන් ට්රයිඩන්ට් සමාගම වෙත දැනටමත් අමෙරිකානු ඩොලර් මිලියන 8.1 ක දඩ මුදලක් පනවා තිබේ.
එසේ වුවද, දිගින් දිගටම සිදුවන සැපයුම් පමාවන් සහ ප්රමිතියෙන් තොර ගල්අඟුරු සැපයීම නොසලකා, එම සමාගම සමඟ ඇති කොන්ත්රාත්තුව අවලංගු කිරීමට බලධාරීන් මෙතෙක් පියවර ගෙන නැත .