ඉන්දියාවේ නව අගමැතිවරයා ලෙස තුන්වැනි වරටත් පත් වූ නරේන්ද්‍ර මෝදිට අමෙරිකාවේ ජනාධිපති ජෝ බයිඩ්න් දුරකතන ඇමතුමක් ලබා දී සුබ පතා ඇති බව විදෙස් මාධ්‍ය පවසනවා.
එහිදී ඉන්දියාව සහ අමෙරිකාව අතර ඇති සහයෝගිතාව ගෝලීය යහපත උදෙසා අඛණ්ඩ බලපෑමක් වන බව ඔවුන් දෙදෙනා ප්‍රකාශ කර ඇති බවයි එරට මාධ්‍ය වාර්තා පවසන්නේ.
පසුගියදා නිමාවට පත්වූ ඉන්දීය මහමැතිවරණයෙන් භාරතීය ජනතා පක්ෂය ඇතුළු ජාතික ප්‍රජාතන්ත්‍රවාදී සන්ධානය පාර්ලිමේන්තුවේ බහුතරය අත්කර ගත්තා.
ඉන්දීය ප්‍රජාතන්ත්‍රවාදය අමෙරිකානු ජනාධිපතිවරයාගේ පැසසුමට ලක්වීම ඉහළින් අගය කරන බව බයිඩ්න් සමග පැවැති දුරකතන සංවාදයෙන් පසු X සමාජ මාධ්‍යජාලයේ සටහනක් තබමින් නරේන්ද්‍ර මෝදි ප්‍රකාශ කර ඇති අතර, දෙරට අතර සහයෝගීතාව මනුෂ්‍ය යහපත වෙනුවෙන් ගෝලීය බලයක් බවට පත්වනු ඇති බව ඔහු අපේක්ෂා කරන බව සඳහන් කර තිබෙනවා.
ඉදිරි වසර කිහිපයේදී අමෙරිකාව සහ ඉන්දියාව අතර සම්බන්ධතාව තවදුරටත් ශක්තිමත් කිරීමට අවශ්‍ය පියවර ගැනීමට නියමිත බවද වාර්තා වේ.