ශ්රී ලංකා නීතිඥ සංගමයේ සභාපති රජිව් අමරසූරිය විනිසුරුවරුන්ගේ විශ්රාම වයස දීර්ඝ කිරීමේ ආණ්ඩුවේ උත්සහය ගැන අදහස් දක්වයි . සිය ෆේස්බුක් ගිණුම ඔස්සේ ප්රකාශයක් නිකුත් කරමින් ඔහු පවසනුයේ විනිසුරුවන්ගේ විශ්රාම වයස දීර්ඝ කිරීමට කටයුතු කරන ආණ්ඩුවට ‘බුද්ධිය පහළ වේවා’ යනුවෙනි.
”ශ්රී ලංකාවේ දිසා විනිසුරුවරුන් සහ මහේස්ත්රාත්වරුන් නියෝජනය කරන ශ්රී ලංකා අධිකරණ සේවා සංගමය විසින් 2026 ජූලි 22 දින ගරු අධිකරණ අමාත්යතුමා වෙත යොමු කරන ලද ලිපිය මඟින්, විනිසුරුවරුන්ගේ විශ්රාම වයස දීර්ඝ කිරීම සඳහා යෝජනා කර ඇති ආණ්ඩුක්රම ව්යවස්ථා සංශෝධනයට ඉතා පැහැදිලිව සහ දැඩි ලෙස විරෝධය පළ කර ඇත. මෙය හුදෙකලා විරෝධතාවක් නොවේ.
වඩාත් වැදගත් කරුණ වන්නේ, සති කිහිපයකට පෙර පැවති අධිකරණ සේවා සංගමයේ විශේෂ මහා සභා රැස්වීමේදී, එම යෝජනාවෙන් තමන්ටම ප්රතිලාභ ලැබෙන තත්ත්වයක් තිබියදීත්, රහස් ඡන්දයකින් සහභාගී වූ විනිසුරුවරුන් 65 දෙනාම එයට විරුද්ධව ඡන්දය ප්රකාශ කිරීමයි.
එසේ තිබියදීත්, අද Sunday Observer පුවත්පත වාර්තා කරන්නේ මෙම ආණ්ඩුක්රම ව්යවස්ථා සංශෝධනය කඩිනමින් ඉදිරියට ගෙන යාමට රජය අදහස් කර ඇති බවයි.
ප්රජාතන්ත්රවාදය මනිනු ලබන්නේ ආණ්ඩුක්රම ව්යවස්ථාව සංශෝධනය කිරීමට අවශ්ය සංඛ්යා බලය තිබීමෙන් පමණක් නොවේ. එය විනිවිදභාවය, වගවීම, ආයතනවලට ගරු කිරීම සහ ආණ්ඩුක්රම ව්යවස්ථාමය මූලධර්මවලට ගරු කිරීම මත මනිනු ලැබේ.
සියලු ආයතනික විරෝධතා නොසලකා හරිමින්, රහසිගත හා විනිවිදභාවයෙන් තොර ක්රියාවලියක් හරහා ආණ්ඩුක්රම ව්යවස්ථා සංශෝධනයක් ඉදිරියට ගෙන යන්නේ නම්, එය ප්රජාතන්ත්රවාදී පාලනය සහ යහපාලනය යන මූලධර්මවලින් බරපතළ ලෙස බැහැර වීමකි. බොහෝ දෙනාගේ මතය අනුව, එවැනි ක්රියාවලියක් ආණ්ඩුක්රම ව්යවස්ථාමය බලය දූෂිත ලෙස භාවිත කිරීමක් ලෙස සැලකිය හැකිය.
මෙම සංශෝධනයේ යෝජකයන්ට යහපත් බුද්ධිය පහළ වී, අපගේ ආණ්ඩුක්රම ව්යවස්ථාමය ප්රජාතන්ත්රවාදයේ දිගුකාලීන යහපතට ප්රමුඛත්වය දෙමින් නැවත සිතා බැලීමට ඔවුන් කටයුතු කරනු ඇතැයි මම අවංකව බලාපොරොත්තු වෙමි.”