සම්මානනීය ගී පද රචකයෙකු මෙන්ම ග්රන්ථ කතුවරයෙකු වූ පූජ්ය රඹුකන සිද්ධාර්ථ හිමියෝ අද පස්වරුවේ අපවත් වූහ .
අපවත්වන විට 76 වන වියෙහි පසු වූ උන්වහන්සේ අසනීප තත්ත්වයක් හේතුවෙන් රෝහල්ගතව ප්රතිකාර ලබමින් සිටියදී මෙලෙස අපවත් වු බව වාර්තා වේ .
1950 වසරේ මැයි 22 වැනිදා දෙණියාය රඹුකන ප්රදේශයේදී උපත ලද උන්වහන්සේගේ ගිහි නම ආනන්ද ලියනගේ නම් විය. 1963 වසරේ ජූලි 22 වැනිදා වැලිව ගංගාතිලක විහාරස්ථානයේදී “රඹුකන සිද්ධාර්ථ” නමින් පැවිදි බිමට අවතීර්ණ වූ උන්වහන්සේ, 1972 වසරේදී මහනුවර මල්වතු මහාවිහාර උපෝසථාගාරයේදී උපසම්පදා ලැබූහ .
මොරවක වැලිව බෞද්ධ මිශ්ර පාසලෙන් මූලික අධ්යාපනය ලද උන්වහන්සේ, ගාල්ල හෙට්ඨාචල පිරිවෙනෙන් සහ පැපිලියාන සුනේත්රාදේවි පිරිවෙනෙන් ද්විතීක අධ්යාපනය ලබා, අනතුරුව කැළණිය විශ්වවිද්යාලයෙන් බෞද්ධ දර්ශනය පිළිබඳ විශේෂ උපාධියක් ද හදාරා ඇත.
‘ලා දළු බෝපත්’, ‘මේ ඉර හඳ යට’, ‘සඳ තරු මල්’, ‘බුදු හාමුදුරුවෝ අපිත් දකින්නැති’, ‘සෙනෙහස පුදා’, ‘බුදු බණ ඇසුවා’, ‘මේ ප්රේම කතා’, ‘අව්වට වැස්සට හුරු මිනිසුන්නේ’, ‘වෙහෙරක් වගේ’, ‘පන්සලේ පල්ලියේ’ සහ ‘සියක් ආයු ලැබ’ වැනි උන්වහන්සේ විසින් රච්ත ගීත මෙරට ශ්රාවකයන් අතර ඉමහත් ජනප්රිය විය .
‘සඳකඩපහණ’ චිත්රපටය වෙනුවෙන් ලියූ ‘පෙර සංසාරේ’ ගීතය සඳහා සරසවිය සම්මානයෙන් පිදුම් ලැබූ උන්වහන්සේ, ‘ආලෝකෝ උදපාදී’ චිත්රපටය වෙනුවෙන් රචිත ‘සැඩ පහරක් සේ එකමුතු වූ දා’ ගීතය වෙනුවෙන් දෙරණ සිනමා සම්මානයද දිනා ගත්හ.
1987 වසරේ ‘සංසාරේ අපි’ කැසට් පටයෙන් ඇරඹි උන්වහන්සේගේ ගී නිර්මාණ අතරට ‘ගම්මානේ අපි’, ‘සමනල කන්ද’, ‘සංසාරේ ගී යාතිකා’, ‘බුදු අමා වැස්ස’, ‘සංසාර චාරිකා’ වැනි කැසට් පට සහ සංයුක්ත තැටි මෙන්ම ‘සසර දනව්ව’ වැනි සම්මානනීය ගේය පද සංග්රහයක් ද ඇතුළත් වේ.