2026 වසරේ මුල් මාස හය ඇතුළත ශ්‍රී ලංකාවෙන් අලුතින් HIV ආසාදිතයන් 487 දෙනකු වාර්තා වී ඇති අතර, එය පසුගිය වසරේ එම කාලපරිච්ඡේදය සමග සසඳන විට සැලකිය යුතු ඉහළ යාමක් බව අනාවරණය වේ.
ජාතික ලිංගාශ්‍රිත රෝග සහ ඒඩ්ස් මර්දන ව්‍යාපාරය මගින් නිකුත් කරන ලද නවතම වාර්තාවලට අනුව, 2026 වසරේ පළමු කාර්තුවේදී නව ආසාදිතයන් 249 දෙනකු සහ දෙවැනි කාර්තුවේදී තවත් ආසාදිතයන් 238 දෙනකු වාර්තා වී ඇත.
2025 වසරේ මුල් අර්ධයේදී වාර්තා වූ HIV ආසාදිතයන් 430 දෙනාගේ සංඛ්‍යාවට (පළමු කාර්තුවේදී 230 ක් සහ දෙවැනි කාර්තුවේදී 200 ක්) සසඳන විට මෙය සියයට 13.3 ක වර්ධනයකි.
නවතම දත්තවලට අනුව ආසාදිතයන් අතරින් බහුතරය තවදුරටත් පිරිමි පුද්ගලයන් වන අතර, 2026 දෙවැනි කාර්තුව වන විට පිරිමි සහ ගැහැණු ආසාදිතයන් අතර අනුපාතය 7:1 ක් ලෙස සටහන් වේ.
වයස අවුරුදු 15 ත් 24 ත් අතර පසුවන තරුණ ප්‍රජාව අතුරින් මේ වසරේ මුල් මාස හය තුළ HIV ආසාදිතයන් 55 දෙනකු වාර්තා වී ඇති අතර, ඊට පිරිමි පුද්ගලයන් 48 දෙනකු, කාන්තාවන් 6 දෙනකු සහ එක් සංක්‍රාන්ති ලිංගික පුද්ගලයකු ඇතුළත් වේ.
එමෙන්ම, 2026 වසරේ මුල් කාර්තු දෙක තුළ ඒඩ්ස් (AIDS) රෝගය හේතුවෙන් සිදුවූ මරණ 8 ක් වාර්තා වී ඇති අතර, එක් කාර්තුවකට මරණ 4 බැගින් වාර්තා වී තිබේ. මේ අනුව මෙරටින් වාර්තා වූ සමස්ත ඒඩ්ස් මරණ සංඛ්‍යාව 820 දක්වා ඉහළ ගොස් ඇති අතර, ඒඩ්ස් නොවන වෙනත් හේතූන් මත සිදුවූ මරණ 111 ක් ද හඳුනාගෙන ඇත. 2025 වසර දක්වා වාර්තා වූ සමස්ත HIV ආසාදිතයන් අතරින් සිදුවූ මරණවල මුළු සංඛ්‍යාව 1,708 කි.
එම වාර්තාව වැඩිදුරටත් පෙන්වා දෙන්නේ මවගෙන් දරුවාට HIV වෛරසය ආසාදනය වූ අවස්ථා 117 ක් මෙතෙක් හඳුනාගෙන ඇති නමුත්, 2025 වසරේ හතරවැනි කාර්තුව තුළදී එවැනි කිසිදු ආසාදනයක් වාර්තා වී නොමැති බවයි.
මේ අතර, ආගමන විගමන සෞඛ්‍ය ඒකකය හරහා ද HIV ආසාදිතයන් 73 දෙනකු හඳුනාගෙන ඇති අතර, ඊට 2026 දෙවැනි කාර්තුවේදී හඳුනාගත් ආසාදිතයන් 9 දෙනකු ද ඇතුළත් වේ.