වසර 27කට පසුව යාවත්කාලීන කළ ජාතික ඛනිජ ප්රතිපත්තිය මේ වනවිට බලාත්මක කර ඇති බැවින්, මින් ඉදිරියට අගය එකතු කිරීමකින් තොරව මෙරට ඛනිජ සම්පත් රටින් පිටකිරීම තහනම් බව කර්මාන්ත සහ ව්යවසායකත්ව සංවර්ධන අමාත්ය සුනිල් හඳුන්නෙත්ති පැවසීය .
ඒ අනුව මෙරට ඛනිජ සම්පත් අගය එකතු කිරීමකින් තොරව , අමුද්රව්ය ලෙස රටින් පිට කිරීම මින් ඉදිරියට තහනම් වන අතර, නව ප්රතිපත්තිය තුළ ගවේෂණය, කැනීම් කිරීම, සකස් කිරීම සහ අගය එකතු කිරීම යන සියල්ල නියාමනය කෙරෙනු ඇත.
යාවත්කාලීන කළ නව ජාතික ඛනිජ ප්රතිපත්තිය බලාත්මක කිරීමේ සම්බන්ධයෙන් ඊයේ (11) පැවති ප්රවෘත්ති සාකච්ඡාවකදී කර්මාන්ත සහ ව්යවසායකත්ව සංවර්ධන අමාත්ය සුනිල් හඳුන්නෙත්ති මේ ලෙස පැවසීය .
”අපේ ඛනිජ සම්පත් සියල්ලම වගේ අපනයන වෙළඳපොළට ගිහිල්ලා තියෙන්නේ අමුද්රව්ය හැටියට. මේවායින් එකතු විය හැකි ඇත්ත ඩොලර් වටිනාකම රටේ ජාතික ආර්ථිකයට එකතු වුණේ නැහැ. අපි ටොන් එකක් ඩොලර් 2,000කට අපනයනය කරොත් උදාහරණෙකට ඛනිජ වර්ගයක එක කිලෝ එකක් ඩොලර් 20,000ක අගයකට වර්ධනය කරන්න පුළුවන් . අපි ඒ මට්ටමේ ඒවා තමයි අපි ඩොලර් 2000ක අමුද්රව්ය ලෙස යවලා තියෙන්නේ .
සර්කොන්, ගානට්, සිලිකන්, වාර්ස්, ටයිටේනියම් මේ ඕන දෙයක් එහෙම තමයි වෙලා තියෙන්නේ. දශක ගණනාවක් තිස්සේ යාවත්කාලීන නොවිච්ච ප්රතිපත්ති තත්ත්වයන් නිසා හුඟාක් වෙලාවට ගවේෂණ බලපත්රවලට විතරක් මේ ඛනිජ සම්පත් සීමා වෙලා තිබුණා.
දැන් ගවේෂණය, කැණීම් කිරීම, සකස් කිරීම, අගය එකතු කිරීම ඒ කියන සමස්ත ක්රියාවලිය නියාමනය කරන්න ක්රමයක් හදලා තියනවා. ඒ ක්රමය දැන් කැබිනට් මණ්ඩලය අනුමත කරලා අවසානයි. ඒ වගේම පාර්ලිමේන්තුවට ඉදිරිපත් කරලා තියෙනවා. මේ ජූනි මාසෙ එකොළොස් වෙනිදා ඉඳලා නව ඛනිජ ප්රතිපත්තිය ක්රියාවට නැගෙනවා. ”