අප්‍රේල් මාසයේ දී මෙරට නිෂ්පාදන ක්‍රියාකාරකම්වල පසුබෑමක් පෙන්නුම් කරන බව ශ්‍රී ලංකා මහ බැංකුව පවසනවා.
මාර්තු මාසයේ 62.05%ක් ලෙස පැවති නිෂ්පාදන අංශයේ ශ්‍රී ලංකා ගැණුම් කළමණාකරුවන්ගේ දර්ශකය පසුගිය මාසයේ දී 42%ක් ලෙස වාර්තා වී තිබෙනවා.
ඒ අනුව, මාසයක් තුළදී නව ඇණවුම්, නිෂ්පාදන, සේවා නියුක්තිය සහ තොග මිලදී ගැනුම් උපදර්ශක පහළ වැටීමෙහි ප්‍රතිඵලයක් ලෙස සමස්ත දර්ශයක පහත වැටී ඇති බව මහ බැංකුව පවසනවා.
මෙම පසුබැසීම සඳහා මූලික වශයෙන් සිංහල හා දෙමළ අලුත් අවුරුදු නිවාඩුව ඔවුන් පෙන්වා දී තිබෙනවා.
එමෙන්ම අප්‍රේල් මාසයේදී කර්මාන්ත ශාලා බොහොමයක් තාවකාලිකව වසා දැමීම බලපා ඇති අතර දීර්ඝ නිවාඩු දින හේතුවෙන් ඇණවුමක් සැපයීමට සැපයුම්කරුවන්ට ගතවන කාලය පෙර මාසයට සාපේක්ෂට අප්‍රේල් මාසයේ දී වැඩි වේගයකින් ඉහළ යන ගොස් ඇති බව ද ඔවුන් සඳහන් කරනවා.
සේවා අංශයෙහි ශ්‍රී ලංකා ගැණුම් කළමනාකරුවන්ගේ දර්ශකය 56.7%ක් ලෙස මන්දගාමී වර්ධනයක් පෙන්නුම් කර තිබෙනවා.
මාර්තු මාසයේ ප්‍රතිපත්ති පොලී අනුපාත අඩු කිරීමත් සමඟ මූල්‍ය සේවා උප අංශයේ ව්‍යාපාර ක්‍රියාකාරකම් තව දුරටත් වර්ධනය වී ඇති අතර උත්සව සමයේ පැවති ඉල්ලුම මධ්‍යයේ තොග සහ සිල්ලර වෙළෙඳාම උප අංශයේ ව්‍යාපාරවල ක්‍රියාකාරකම්වල සැලකිය යුතු ප්‍රගතියක් ඇති වී ඇති බව සඳහන් වනවා.
මේ අතර, වැඩසටහන් සහ විකාශන, විදුලි සංදේශ, සහ දේපළ වෙළඳාම යන උප අංශ ද අප්‍රේල් මාසය තුළ ධනාත්මක වර්ධනයන් වාර්තා කර තිබෙනවා.
කෙසේවුවත් මාර්තු මාසයට සාපේක්ෂව අප්‍රේල් මාසයේ දී සංචාරක පැමිණීම් පහළ යෑමට සමගාමීව නවාතැන් හා ආහාරපාන සැපයීමේ සේවා උප අංශය සුළු වශයෙන් පහත වැටී ඇති බව ශ්‍රී ලංකා මහ බැංකුව වැඩිදුරටත් සඳහන් කරනවා.