අමෙරිකාවේ කැස්සාස් ජනපදය විසින් ෆයිසර් එන්නත් සමාගමට නඩු පවරා ඇති බව විදෙස් මාධ්‍ය වාර්තා කරනවා.
ඒ අතුරු ආබාධ ඇතිවීමේ අවදානම පිළිබඳව දැනුවත් වුවත් ඒ බව වසං කරමින්, ‘ෆයිසර්’ ඖෂධ නිෂ්පාදන සමාගම, ඔවුන්ගේ එන්නත් ජනතාවට ලබා දුන් බවට චෝදනා කරමින්.
‘ෆයිසර්’ සමාගමට එරෙහිව මෙලෙස නඩු පැවැරීමක් සිදුකර ඇත්තේ, කැන්සාස් ජනපද නීතිපතියෙකු වන ක්‍රිස් කොබෙච්ගේ මැදිහත් වීමකින් බවයි විදෙස් මාධ්‍ය උපුටා දක්වන්නේ.
‘ෆයිසර්’ යනු වසර 175 කට වැඩි කාලයක් තිස්සේ ජනතා විශ්වාසය දිනාගත් ලොව ප්‍රමුඛ පෙළේ අමෙරිකානු ඖෂධ නිෂ්පාදන සමාගමකි.
ජර්මන් සමාගම් දෙකක් ද ‘ෆයිසර්’ සමග අත්වැල් බැඳගෙන සිස්ටිනවා.
‘ෆයිසර්’ සමාගමේ මූලස්ථානය පිහිටා ඇත්තේ අමෙරිකාවේ නිව්යෝක් නුවරයි.
ගෝලීය වසංගතයක් බවට පත්වුණු ‘කොවිඩ් 19’ වයිරසය පාලනය සඳහා ලොව රටවල් රැසක භාවිත කෙරුණු වඩාත් ආරක්ෂිත යැයි පැවැසුණු ප්‍රතිශක්තිකරණ එන්නත වූයේ මෙම ‘ෆයිසර්’ එන්නතයි.
මේ වනවිට, ඔකස්ෆර්ඩ් විශ්ව විද්‍යාලයේ වෛද්‍ය පර්යේෂකයන් මැදිහත් වී නිපදවා, ‘කොවිඩ් 19’ වයිරසයට එරෙහි ප්‍රතිශක්තිකරණ එන්නතක් ලෙස ලබා දුන් බ්‍රිතාන්‍යයේ ‘ඇස්ට්‍රාසෙනකා’ සමාගමේ ‘ඇස්ට්‍රාසෙනකා’ ප්‍රතිශක්තිකරණ එන්නත සම්බන්ධයෙන් ද ගැටලු මතු වී තිබෙනවා.
ඒ ‘ඇස්ට්‍රාසෙනකා’ එන්නත හේතුවෙන් රුධිර කැටි ගැසීම් ඇති වෙනවා යැයි අධිකරණය හමුවේ තහවුරු වීමත් සමගයි.
එන්නත ලබා ගැනීමෙන් පසු අතුරු ආබාධ හටගන්නා බව තහවුරු වීමත් සමග ගෝලීය වශයෙන් බෙදා හරිනු ලැබූ එම එන්නත් ආපසු ගෙන්වීමට ද ඇස්ට්‍රාසෙනකා ඖෂධ සමාගම පියවර ගත්තා.
ඇස්ට්‍රාසෙනකා සමාගම මේ සම්බන්ධයෙන් පැහැදිලි කර ඇත්තේ එන්නත යවත්කාලීන කරමින් දෝෂ නිවැරදි කර, නව ‘කොවිඩ් 19’ වයිරස ප්‍රභේද අඩපණ කළ හැකි ආකාරයට යළි නිපදවීට පියවර ගන්නා බවයි.