මෙරට පරිගණක සාක්ෂරතාවය 39%ය දක්වා ඉහළ ගොස් ඇති බව ජනලේඛන හා සංඛ්‍යාලේඛන දෙපාර්තමේන්තුව පවසනවා.
2023 වසරේ පරිගණක සාක්ෂරතා සමීක්ෂණ වාර්තාවේ දැක්වෙන්නේ මෙරට අවුරුදු 05-69ත් අතර පුද්ගලයින් 05 දෙනෙකුගෙන් දෙදෙනෙකුට පමණක් පරිගණක සාක්ෂරතාව පවතින බවයි.
එසේම පුද්ගලයින් 05 දෙනෙකුගෙන් තිදෙනෙකුට ඩිජිටල් සාක්ෂරතාව පවතින බවත් එය 63.5%ක් බවත් එම දෙපාර්තමේන්තුව පෙන්වා දෙනවා.
මෙරට පවුල්වලින් 20.2%ක් ඩෙක්ස්ටොප් හෝ ලැප්ටොප් පරිගණක භාවිතා කරන අතර නාගරික ජනතාවගේ පරිගණක හා ඩිජිටල් සාක්ෂරතාවයේ වැඩිවීමක් පෙන්නුම් කර තිබෙනවා.
2021 වසරට සාපේක්ෂව 2023 වසර වන විට මෙරට පරිගණක සාක්ෂරතාවය 4.7%කින් ඉහළ ගොස් තිබෙනවා.
52.9%ක වැඩිම පරිගණක සාක්ෂරතාවයක් වාර්තා වන්නේ නාගරික ප්‍රදේශවලින්ය.
බස්නාහිර පළාතේ වැඩිම පරිගණක සාක්ෂරතාවයක් පවතින අතර නැගෙනහිර පළාතේ පරිගණක සාක්ෂරතාවක් අඩුවක් පවතින බව ජනලේඛන හා සංඛ්‍යාලේඛන දෙපාර්තමේන්තුව වැඩිදුරටත් සඳහන් කරනවා.