ක්‍රිකට් ක්‍රීඩාවේ නවතම තරග ආකෘතියක් වන ‘ටෙස්ට් ටුවෙන්ටි’ (Test Twenty) තරගාවලිය නොවැම්බර් 14 සිට 29 දක්වා කොළඹ සිංහල ක්‍රීඩා සමාජ (SSC) ක්‍රීඩාංගණයේදී පැවැත්වීමට නියමිතය. මෙම තරගාවලියේ විශේෂත්වය වන්නේ පිරිමි සහ කාන්තා කණ්ඩායම්වල ලකුණු එකතු කර එක් කණ්ඩායමක අවසන් ලකුණු සංඛ්‍යාව තීරණය කිරීමයි.
මාධ්‍ය නිවේදනයකට අනුව, ‘ක්‍රිකට් ක්‍රීඩාවේ සිව්වැනි ආකෘතිය’ ලෙස හඳුන්වා දී ඇති මෙම තරගාවලියේ පළමු අදියර සඳහා වයස අවුරුදු 13ත් 21ත් අතර ක්‍රීඩක ක්‍රීඩිකාවන් 160 දෙනෙකු සහභාගී වෙති. ලොව පුරා රටවලින් තෝරාගනු ලබන ඔවුන් මහාද්වීප හතරක් නියෝජනය කරන කණ්ඩායම් හතරකට බෙදා ඇත. සෑම කණ්ඩායමකටම ක්‍රීඩක ක්‍රීඩිකාවන් 40 දෙනෙකු ඇතුළත් වන අතර, ඒ අතරට පිරිමි ක්‍රීඩකයන් 20 දෙනෙකු සහ කාන්තා ක්‍රීඩිකාවන් 20 දෙනෙකු බැගින් ඇතුළත් වේ.
සෑම තරගයකදීම එක් කණ්ඩායමක කාන්තා කණ්ඩායම අනෙක් කණ්ඩායමේ කාන්තා කණ්ඩායම සමඟ තරග වදින අතර, පිරිමි කණ්ඩායම් දෙකද වෙන වෙනම තරග වදියි. කෙසේ වෙතත්, මෙම තරග දෙකේදීම ලබාගන්නා ලකුණු එකතු කර එක් කණ්ඩායමක සමස්ත ලකුණු සංඛ්‍යාව තීරණය කෙරේ. ජයග්‍රාහකයා තීරණය කරනු ලබන්නේ එම ඒකාබද්ධ ලකුණු සංඛ්‍යාව අනුවය.
කාසියේ වාසිය උරගා බැලීමේදීද මෙම ආකෘතිය යටතේ වෙනසක් සිදුවේ. පළමුව පන්දුවට පහර දෙන කණ්ඩායම තීරණය කිරීමට අමතරව, පළමුව පැවැත්වෙන්නේ කාන්තා තරගයද නැතහොත් පිරිමි තරගයද යන්නද එමඟින් තීරණය කෙරේ.
මාධ්‍ය නිවේදනයට අනුව, මෙම ආකෘතියේ ‘සමානාත්මතා නීතිය’ (Parity Rule) යටතේ එක් කණ්ඩායමක කාන්තා හෝ පිරිමි කණ්ඩායම ලබාගන්නා ලකුණු අනෙක් කණ්ඩායමේ තරගයේ ප්‍රතිඵලයටද සෘජුවම බලපානු ඇත.
එක් තරගයක් එක් දිනක් තුළ පන්දුවාර 80කින් සමන්විත වේ. පළමු පන්දුවාර 40 දිවා කාලයේදී රතු පන්දුවෙන් ක්‍රීඩා කරන අතර, ක්‍රීඩක ක්‍රීඩිකාවෝ සුදු ඇඳුමින් සැරසී ක්‍රීඩා කරති. ඉතිරි පන්දුවාර 40 විදුලි ආලෝකය යටතේ සුදු පන්දුවෙන් පැවැත්වෙන අතර, එහිදී ක්‍රීඩක ක්‍රීඩිකාවෝ වර්ණ ඇඳුමින් සැරසී ක්‍රීඩා කරති. මෙම අවස්ථා දෙකේදීම ලබාගන්නා ලකුණු එකතු කෙරෙන අතර, දෙවැනි අවස්ථාව ආරම්භයේදී ලකුණු නැවත බින්දුවේ සිට ගණනය කිරීමක් සිදු නොවේ.
තරගාවලිය ආරම්භ කිරීමේ උත්සවය නොවැම්බර් 14 වැනිදා පැවැත්වෙන අතර, අවසන් මහා තරගය නොවැම්බර් 29 වැනිදා පැවැත්වීමට නියමිතය. නොවැම්බර් 30 වැනිදා අතිරේක දිනයක් ලෙස වෙන් කර ඇත. සියලුම තරග Sony Sports Network ඔස්සේ සජීවීව විකාශය කෙරේ.
මහාද්වීප පහකින් තරුණ ක්‍රිකට් ක්‍රීඩක ක්‍රීඩිකාවෝ දහස් ගණනක් මෙම තරගාවලියට සහභාගී වීමට අයදුම් කර තිබීම විශේෂත්වයකි. පසුගිය දින 300ක කාලය තුළ පැවති ක්‍රීඩාංගණ පරීක්ෂණ සහ මාර්ගගත තේරීම් ක්‍රියාවලිය ඔස්සේ ඔවුන් අතරින් දක්ෂතම පිරිස තෝරාගෙන ඇත. ඉන් අනතුරුව, තරගාවලියේ ගෝලීය තේරීම් කමිටුව විසින් අවසන් තේරීම සිදු කර තිබේ. ඉන්දියාවේ ප්‍රකට පුහුණුකරුවකු වන රාජ්කුමාර් ශර්මා එම කමිටුවේ සභාපතිවරයා ලෙස කටයුතු කරයි.
මෙම මාසයේ අගභාගයේදී පැවැත්වෙන ක්‍රීඩක තේරීම් කෙටුම්පත් ක්‍රියාවලියෙන් (Players’ Draft) ටෙස්ට් ටුවෙන්ටි තරගාවලියට සහභාගී වන අවසන් ක්‍රීඩක ක්‍රීඩිකාවන් 160 දෙනා නම් කෙරේ. ඒ අතරට පිරිමි ක්‍රීඩකයන් 80 දෙනෙකු සහ කාන්තා ක්‍රීඩිකාවන් 80 දෙනෙකු ඇතුළත් වන අතර, ඔවුහු ටෙස්ට් ටුවෙන්ටි තරගාවලියේ පළමු ක්‍රීඩක කණ්ඩායම ලෙස ඉතිහාසයට එක්වෙති.
ඒ.බී. ඩිවිලියර්ස්, මැතිව් හේඩ්න් සහ ශ්‍රීමත් ක්ලයිව් ලොයිඩ් ඇතුළත් උපදේශක මණ්ඩලයක්ද, රාජ්කුමාර් ශර්මාගේ සභාපතිත්වයෙන් යුත් ගෝලීය තේරීම් කමිටුවක්ද මෙම ව්‍යාපෘතියට සම්බන්ධ වී සිටිති. ක්‍රිකට් මෙහෙයුම් කටයුතු මෙහෙයවනු ලබන්නේ මයික් ෆෝර්ඩ්හැම් විසිනි. ක්‍රිකට් ක්‍රීඩාවේ ඉහළම මට්ටමින් ක්‍රීඩා කළ, පුහුණු කළ සහ පරිපාලන කටයුතුවල නිරත වූ පිරිසක් මෙම නව තරග ආකෘතියේ තරුණ ක්‍රීඩක ක්‍රීඩිකාවන්ට සහාය ලබාදෙති.
ටෙස්ට් ටුවෙන්ටි තරගාවලියේ නිර්මාතෘ ගෞරව් බහිර්වානි මහතා පැවසුවේ, පිරිමි සහ කාන්තා ක්‍රීඩක ක්‍රීඩිකාවන්ගේ දක්ෂතා කණ්ඩායමක ප්‍රතිඵලයට සමානව දායක වන නව ක්‍රිකට් ආකෘතියක් සහ තරුණ ක්‍රීඩක ක්‍රීඩිකාවන් වෙනුවෙන්ම වෙන් වූ වේදිකාවක් නිර්මාණය කිරීම මෙම තරගාවලියේ අරමුණ බවයි.
මෙම මංගල තරගාවලිය කොළඹදී පැවැත්වීමට සහාය ලබාදීම සම්බන්ධයෙන් ශ්‍රී ලංකා ක්‍රිකට් ආයතනයට සහ සිංහල ක්‍රීඩා සමාජයට සිය කෘතඥතාව පළ කළ ඔහු, එය ක්‍රිකට් ක්‍රීඩාවේ ඓතිහාසික අවස්ථාවක් බවද සඳහන් කළේය.
“මීට වසරකට පෙර, මේ සතියේදීම, ඒ.බී., මැතිව්, ශ්‍රීමත් ක්ලයිව්, මයික් සහ රෝහිත් සමඟ එක්ව මම ටෙස්ට් ටුවෙන්ටි ලොවට හඳුන්වා දුන්නා. ඒ වන විට එය කඩදාසියක සටහන් වූ අදහසක් පමණයි. ලොව පුරා තරුණ ක්‍රිකට් ක්‍රීඩක ක්‍රීඩිකාවන්ට අප ලබාදුන් පොරොන්දුවක්ද එහි තිබුණා. ඒ ඔවුන් වෙනුවෙන්ම වූ ක්‍රිකට් ආකෘතියක්, තරගාවලියක් සහ ඔවුන් වටා ගොඩනැඟුණු ක්‍රමවේදයක් නිර්මාණය කිරීමයි.
“නොවැම්බර් 14 වැනිදා එම පොරොන්දුව ප්‍රථම වරට සැබෑවක් බවට පත්වන්නේ කොළඹ SSC ක්‍රීඩාංගණයේදීයි. සමානාත්මතාව කියන්නේ නීතිවලින් හෝ ක්‍රීඩාව පැවැත්වෙන ආකාරයෙන් පමණක් සීමා වන දෙයක් නොවෙයි. එය සජීවී විකාශනය තුළින්ද පිළිබිඹු විය යුතුයි. ඇතැම් රාත්‍රීවලදී විදුලි ආලෝකය යටතේ, ප්‍රධාන විකාශන වේලාවන්හිදී, ලොව පුරා ප්‍රේක්ෂකයන් ඉදිරියේ ක්‍රීඩා කරන්නේ කාන්තා ක්‍රීඩිකාවන්යි. තවත් රාත්‍රීවලදී පිරිමි ක්‍රීඩකයන් ක්‍රීඩා කරාවි. නමුත් සෑම රාත්‍රියකදීම ලකුණු පුවරුව එකක් පමණයි,” යනුවෙන් ඔහු පැවසීය.
“මෙම තරගාවලිය සඳහා සුදුසුම ස්ථානය අපට හමු වුණා. ශ්‍රී ලංකාවේ පාසල් ක්‍රිකට් තරගයක් නැරඹීමට පවා ක්‍රීඩාංගණ පිරී ඉතිරී යනවා. මේ දූපත තරුණ ක්‍රිකට් ක්‍රීඩක ක්‍රීඩිකාවන්ට ආදරය කරන තරම් ඔවුන්ට ආදරය කරන වෙනත් රටක් ලෝකයේ නැහැ.
“අපගේ පළමු සාකච්ඡාවේ සිටම ශ්‍රී ලංකා ක්‍රිකට් ආයතනයේ නායකත්වය අපට විශාල සහයෝගයක් සහ දිරිගැන්වීමක් ලබා දුන්නා. ඉන්පසුව SSC ක්‍රීඩා සමාජයේ සභාපතිවරයා සහ කමිටුව ලොව සෑම ප්‍රදේශයකින්ම පැමිණෙන තරුණ ක්‍රීඩක ක්‍රීඩිකාවන් වෙනුවෙන් සිය දොරටු උණුසුම් ලෙස විවෘත කළා. ඒ සියලු දෙනාටම අපි ගැඹුරු කෘතඥතාව පළ කරනවා.
“ක්‍රිකට් ඉතිහාසයේ ප්‍රථම වතාවට ගැහැනු ළමයින් සහ පිරිමි ළමයින් එක්ව ජයග්‍රහණය කරනවා. නැතහොත් එක්ව පරාජය භාර ගන්නවා. එම ඓතිහාසික අවස්ථාව දැන් ශ්‍රී ලංකාවට හිමි වෙනවා. අපි සියලු දෙනාම කොළඹට පැමිණෙනවා,” යනුවෙන්ද ඔහු වැඩිදුරටත් පැවසීය.