රේගුව විසින් රඳවාගෙන ඇති ශුද්ධ වූ කුර්ආන් ග්‍රන්තයේ (දෙමළ පරිවර්තන) තොගය නැවත අපනයනය කිරීමට පියවර ගෙන ඇති බව විදේශ කටයුතු අමාත්‍ය විජිත හේරත් පැවසීය . ඔහු මේ බව පැවසූවේ කැබිනට් තීරණ දැනුම්දීමේ ජනමාධ්‍ය හමුවට එක්වෙමිනි .
එම ග්‍රන්ථ තොගය රේගු රෙගුලාසි උල්ලංඝනය කරමින් එම තොගය ආනයනය කර ඇති බවත්, ආනයනකරු ශුද්ධ වූ කුර්ආන් (දෙමළ පරිවර්තනය) තොගය ඉන්දියාවට නැවත අපනයනය කිරීමට එකඟ වී ඇති බව ඔහු තවදුරටත් පැවසීය.
“ශුද්ධ වූ කුර්ආනයේ අන්තර්ගතය පිළිබඳ අපට කිසිදු ගැටළුවක් නැහැ. ගැටළුව ඇත්තේ එය ආනයනය කර ඇති ආකාරයේයි . එය ආනයනය කර ඇති ආකාරයෙන් දෝෂයක් තියෙනවා, රේගු නීති උල්ලංඝනය කර ඇති නිසා. එබැවින්, ආනයනකරුවන් එය නැවත අපනයනය කිරීමට එකඟ වෙලා තිබෙනවා” අමාත්‍යවරයා පැවසීය.
කෙසේ වෙතත් පසුගිය සතියේ රජය සහ විපක්ෂය නියෝජනය කරන සියලුම මුස්ලිම් පාර්ලිමේන්තු මන්ත්‍රීවරුන් ආගමික කටයුතු අමාත්‍ය හිනිදුම සුනිල් සෙනෙවිගෙන් ඉල්ලා සිටියේ එය වහාම නිදහස් කිරීම සඳහා මැදිහත් වන ලෙසයි.
ආගමික කටයුතු නියෝජ්‍ය අමාත්‍ය මුනීර් මුලෆර් ඇතුළු සියලුම මුස්ලිම් මන්ත්‍රීවරුන් විසින් අත්සන් කරන ලද ලිපියකින් ඔවුන් කියාසිටියේ, ශ්‍රී ලංකා රජය වෙනුවෙන් ක්‍රියාකරන බව පවසමින් ආරක්ෂක අමාත්‍යාංශයේ හිටපු ලේකම්වරයාගේ මැදිහත්වීමෙන් පසුව, 2024 මැයි 16 වන දින ශ්‍රී ලංකා රේගුව විසින් මෙම තොගය (බහාලුම අංක FSCU 8233306) නීතිවිරෝධී ලෙස රඳවාගෙන ඇති බවයි.