දින හතරක් පුරා ජල ප්‍රශ්ණයක් මුල්කරගෙන වැලිඔය හැළඹ වැව ගොවි සංවිධානයේ සභාපතිවරයා යෙදෙමින් සිටි උපවාසය කම්කරු සහ විදේශ රැකියා අමාත්‍ය මනූෂ නානායක්කාර මහතාගේ මැදිහත් වීමෙන් ඊයේ අවසන් කිරිමට එම ගොවි සංවිධානය එකඟ වුණා.
තමන්ගේ ජල ගැටලුවට විසඳුමක් කිසිදු පාර්ශ්වයකින් නොලැබුන බව හැළඹවැව ගොවීහු ඊයේ (04) මුලතිව් හි පුදුකුඩීඉරිප්පු මහජන ක්‍රීඩාංගණයේ පැවති ” ජයගමු ශ්‍රි ලංකා ජනතා ජංගම සේවයට සහභාගී වෙමින් සිටි අමාත්‍ය මනූෂ නානායක්කාර මහතා හමුවී පැවසුවා.
මේ පිළිබදව ජනාධිපතිතුමාගේත් විෂය භාර අමාත්‍යතුමියගේත් අවධානය යොමුකිරීමට අමාත්‍යවරයා කටයුතු කළා.
ඒ අනුව එම ස්ථානයට ඊයේ රාත්‍රියේම පැමිණි අමාත්‍ය මනූෂ නානායක්කාර මහතා, වනජීවී, වනසංරක්ෂණ සහ වාරි මාර්ග ඇමතිනී පවිත්‍රා වන්නිආරච්චි මහත්මිය සමග මෙම තත්ත්වය දුරකථනයෙන් සාකච්ඡා කරන ලද අතර එම සාකච්ඡාවේ දී හැළඹවැව ගොවි ජනපදය තෙක් යාන්ඔය වාරි ජලය ගෙන් ඒමට අවශ්‍ය රුපියල් මිලියන 225 සදහා වන මුදල් ඉදිරි අය වැය මගින් වෙන් කිරීමටද සහතික වුණා.
මේ බව අමාත්‍ය මනූෂ නානායක්කාර මහතා විසින් හැළඹවැව ගොවි සංවිධානයේ සාමාජිකයන්ට දැන්වීමෙන් අනතුරුව ඔවුන් තම විරෝධතාවය අවසන් කිරිමට එකඟ වුණා. ඒ අනුව ගොවි සංවිධානයේ සභාපතිවරයා සිය උපවාසය අතහළ අතර තම ගැටළුවට අදාල සියළු ලේඛණ අමාත්‍යවරයාට බාරදී, ඒවා ජනාධිපති රනිල් වික්‍රමසිංහගේ අවධානයට ලක් කරනා මෙන් ඉල්ලා සිටියා. ඉක්මනින් මේ සදහා මුදල් වෙන් කිරීමට ඇති හැකියාව පිළිබද ජනාධිපතිතුමාගේ අවධානය යොමු කරන බවද අමාත්‍යවරයා සදහන් කර සිටියා.
2013 වර්ෂයේ දී ශ්‍රී ලංකා මහවැලි අධිකාරිය විසින් ගොවි පවුල් තුන්සීයක් පමණ හැළඹවැව ගොවිජන පදයේ පදිංචි කරනාලද අතර මේ වන විට පවුල් දෙසීයයක් පමණ එම ජනපදයේ ජීවත්වනවා.
යාන්ඔය ව්‍යාපාරය යටතේ එම ගොවීන්ට වාරි ජලය ලබාදීම නියමිතව තිබුන මුත් විවිධ හේතූන් මත වාරි ජලය ලබාදීම නිසියාකාරව සිදු නොවූ බව ගොවීහු චෝදනා කරනවා.
එම තත්ත්වය මත ගොවිපවුල් 200 කට පමන වාරි ජලය නොලැබි යාමෙන් ඔවුනගේ වගාවන් කරගත නොහැකි තත්ත්වයක් ඇතිවුණා.
එම තත්ත්වය මත යාන්ඔය ව්‍යාපාරයෙන් තමන්ට වාරි ජලය ලබදෙන ලෙස හැළඹවැව ජනපදයේ ගොවියෝ වගකිවයුත්තන්ගෙන් ඉල්ලා සිටි අතර ඊට අදාල ඇස්තමේන්තුව ග්‍රාමීය ආර්ථික රාජ්‍ය ඇමති කාදර් මස්තාන්ගේ මැදිහත්වීමෙන් සකස් කර තිබුණා.
එහෙත් අනුරාධපුර දිස්ත්‍රික්කයේ සිට ත්‍රිකුණාමලය දිස්ත්‍රික්කයට යාන්ඔය ව්‍යාපාරයේ ජලය ගෙන යාම දිනෙන් දින පමා වු අතර ගොවි සංවිධාන විසින් ඊට කලක සිට විරෝධතාවය දක්වමින් සිටියා. තම ගම්මානයට සමීප දුරකට යාන්ඔය ව්‍යාපාරයේ ජලය පැමිණ ඈති බවත්, ඉතිරි කිලෝ මීටර් හතරක දුර ජලය ගෙන ඒමට වැයවන්නේ රුපියල් මිලියන 225 ක මුදලක් බවත් හැළඹවැව ජනපදයේ ගොවියෝ පෙන්වා දුන්නා.
මනුෂ නානායක්කාර අමාත්‍යවරයා මැදිහත්වූයේ මෙලෙස දීර්ඝ කාලයක් තිස්සේ නොවිසඳී තිබූ ගැටලුවකටයි.
