කොළඹ මහ නගර සභාවේ සතියකට පෙරදී පරාජයට පත් මංගල අයවැය, දෙවන වර ඉදිරිපත් කිරීමේදී පාලක ජාතික ජන බලවේගය ජය ගත් ආකාරය නගරාධිපතිතුමිය සිය හෘද සාක්ෂියට තට්ටු කර විමසා බැලිය යුතු බව විපක්ෂය පවසයි .
කොළඹ මහ නගර සභාවේ විපක්ෂය නියෝජනය කරන සභික රීසා සරූක් සඳහන් කළේ, අයවැය පරාජය කිරීමට නොහැකි වුයේ විපක්ෂයට බහුතරය නොමැති නිසා නොව සිය මන්ත්රීවරුන් සභාවේ නොසිටි නිසා බවයි.
එහිදී මන්ත්රීවරුන් දෙදෙනෙකු අතුරුදන්වී ඇති බවත්, තවත් මන්ත්රීවරයෙකුට පෞද්ගලික හේතුවක් නිසා ඡන්දය විමසීමට පෙර සභාවෙන් නික්මයෑමට සිදුවූ බවත් ඔහු සඳහන් කරයි. එපමනක්ද නොව තවත් සභිකයෙක් නාරාහේන්පිට පොලීසියෙන් රඳවාගෙන සිටි බවද ඔහු පවසයි .
වැඩි දුරටත් අදහස් දක්වමින් ඔහු මෙසේ පැවසීය .
“කොළඹ අයවැය අද පාලක පක්ෂය ජයග්රහණය කළා. අපේ මන්ත්රීවරයෙක්ව නාරාහේන්පිට පොලීසියෙන් උදෙන්ම ගෙදරින් අරගෙන ගිහින් අරගෙන රඳවගෙන තිබ්බා. තවත් මන්ත්රීවරු දෙන්නෙක් අතුරුදන්. ගෙදරත් ගිහින් බැලුවා ඒ මන්ත්රීවරුන් දෙදෙනා නැහැ. එතකොට එතනත් අපිට ඡන්ද 2ක් නැහැ. ඒ වගේම තවත් මන්ත්රීතුමෙකුගේ භාර්යාවට හෘදයාබාධයක් කියලා ඡන්දය භාවිත කිරීම කිට්ටු කරලා එතුමට නික්ම යන්න වුණා. ඒ වගේම අපිත් එක්ක හිටපු මන්ත්රීතුමියක් ඡන්දය පාවිච්චි කළේ ආණ්ඩු පක්ෂයට. අපිට හිතාගන්න පුළුවන් මොකක්ද මෙතන වෙලා තියෙන්නේ කියලා.
එදා පළමුවර අයවැය පරාජයට පත්වූ මොහොතේ නගරාධිපතිතුමිය ප්රකාශ කළා හෘද සාක්ෂියට තට්ටු කරලා බලන්න කියලා . අපි දැන් එතුමියට කියනවා. අද දිනයේ බහුතරය ලබාගත්තේ කොහොමද කියලා ඔබතුමියගේ හෘද ශාක්ෂියට තට්ටු කරලා අහන්න කියලා .අපිට බහුතරය නැති නිසා නෙමෙයි අපි අද පැරදුණේ. මන්ත්රීවරුන් මෙතන නොසිටි නිසා තමයි අපි පරාජයට පත් වුණේ. අපි ඉදිරියටත් අපේ බහුතරය රැක ගනිමින් අපේ කටයුතු කරනවා.”
පළමු වර අයවැයට විපක්ෂව ඡන්ද 60ක් එහිදී හිමි වූ අතර පක්ෂව ලැබුණේ ඡන්ද 57 ක් පමණයි. ඊයේ දිනයේ අයවැයට පක්ෂව ඡන්ද 58ක් හිමිවූ අතර, විපක්ෂව හිමිවූයේ ඡන්ද 56ක් පමණයි.