ඉන්දු – ශ්‍රි ලංකා සබඳතා සවිමත්ව ඉදිරියට ගෙන යාමට ජනාධිපති රනිල් වික්‍රමසිංහ මහතා සහ ඉන්දියාවේ අග්‍රාමාත්‍ය ධූරයේ දිවුරුම් දුන් නරේන්ද්‍ර මෝදි මහතා ප්‍රතිඥා ලබා දී තිබෙනවා.
නරේන්ද්‍ර මෝදි මහතාගේ දිවුරුම් දීමේ උත්සවය ඊයේ (09) පස්වරුවේ නවදිල්ලි නුවර රාෂ්ට්‍රපති භවන්හිදී උත්කර්ෂවත් අන්දමින් පැවැත්වුණු අතර නරේන්ද්‍ර මෝදි මහතාගේ විශේෂ ඇරයුම පරිදි ජනාධිපති රනිල් වික්‍රමසිංහ මහතා ද එම අවස්ථාවට එක් වුණා.
බංග්ලාදේශ අගමැතිනී ෂෙයික් හසීනා, නේපාල අගමැති පුෂ්ප කමල් දහාල්, මාලදිවයින් ජනාධිපති මොහොමඩ් මුයිසු , සීෂෙල්ස් උප ජනාධිපති, මොරිෂියස් අගමැති මෙන්ම භූතාන අගමැතිවරයා ප්‍රමුඛ කලාපයේ රාජ්‍ය නායකයන් රැසක් ද එම උත්සවයට එක්ව සිටියා
මෙම උත්සවයේ දී කලාපයේ නායකයන්ගෙන් ද ජනාධිපති රනිල් වික්‍රමසිංහ මහතාට ඉහළ පිළිගැනීමක් හිමි වූ බව වාර්තා වෙනවා.
ධූරයේ දිවුරුම් දීමෙන් අනතුරුව අග්‍රාමාත්‍ය නරේන්ද්‍ර මෝදි මහතා කලාපයේ නායකයන් සමඟ සමූහ ඡායාරූපයකට ද එක් වූ අතර එහිදී ජනාධිපති රනිල් වික්‍රමසිංහ මහතාට අග්‍රාමාත්‍ය නරේන්ද්‍ර මෝදි මහතා අසළම ස්ථානය වෙන් කර තිබීම ද විශේෂත්වයක් වුණා.
මේ අතර අග්‍රාමාත්‍ය නරේන්ද්‍ර මෝදි මහතා විසින් සංවිධානය කර තිබූ රාත්‍රී භෝජන සංග්‍රහයටද ජනාධිපති රනිල් වික්‍රමසිංහ මහතා ඇතුළු රාජ්‍ය නායකයන් එක් වූ බවයි වාර්තා වෙන්නේ.
එම උත්සවයට ජනාධිපති රනිල් වික්‍රමසිංහ මහතාගේ පැමිණීම පිළිබඳ ඉන්දීය මාධ්‍ය මගින් සුවිශේෂී ප්‍රචාරයක් ලබා දී තිබූ අතර නවදිල්ලි අගනුවර ප්‍රධාන වට රවුම් ආශ්‍රිතව ශ්‍රී ලංකා ජනාධිපතිවරයාගේ සහ මෝදි අගමැතිවරයාගේ රුව සහිත පුවරු ප්‍රදර්ශනය කර තිබෙනවා.
ජනාධිපති රනිල් වික්‍රමසිංහ මහතා සමඟ ජනාධිපති ලේකම් සමන් ඒකනායක, විදේශ කටයුතු අමාත්‍යාංශයේ ලේකම් අරුණි විජේවර්ධන, ඉන්දියාවේ ශ්‍රී ලංකා මහකොමසාරිස් ෂෙනුකා සෙනවිරත්න, රජයේ ප්‍රවෘත්ති අධ්‍යක්ෂ ජනරාල් දිනිත් චින්තක කරුණාරත්න, ජනාධිපති පෞද්ගලික ලේකම් සැන්‍ඩ්‍රා පෙරේරා යන මහත්ම මහත්මීන් එම අවස්ථාවට සහභාගී වී තිබෙනවා.
