හිටපු සෞඛ්‍ය ඇමැතිවරුන් වන පවිත්‍රා වන්නිආරච්චි, චන්න ජයසුමන සහ කෙහෙළිය රඹුක්වැල්ල යන අයගේ පාලන කාලයේදී සෞඛ්‍ය අමාත්‍යාංශය තුළ සිදුවූ දූෂණ හා වංචා සම්බන්ධයෙන් දිගින් දිගටම විගණනය කරුණු විමසන නමුත් අදාළ කරුණු ලබා දීමට වර්තමාන සෞඛ්‍ය බලධාරීන් කටයුතු නොකරන බව සමගි ජන බලවේගයේ දූෂණ විරෝධී බලවේගයේ උප සභාපති විශෙෂඥ වෛද්‍ය චමල් සංජීව පවසයි .
නවතම විගණන වාර්තාවන් විමසීමේදී මේ බව තහවුරු වන බවත්, එමනිසා ඒ සම්බන්ධයෙන් වහාම විමර්ශනයක් පවත්වන ලෙසත් ඔහු අපරාධ පරීක්ෂණ දෙපාර්තමේන්තුවෙන් ඉල්ලීමක් කර තිබේ.
කොවිඩ් එන්නත් ලක්ෂ හැත්තෑවක් පමණ සීමාව ඉක්මවා මිලදීගැනීමෙන් රජයට ඩොලර් මිලියන 70 කට අධික පාඩුවක් සිදුවීම සම්බන්ධව විගණකාධිපතිවරයා දිගින් දිගටම කරුණු විමසා ඇත. එහෙත් වර්තමාන සෞඛ්‍ය නිලධාරීන් අදාළ කරුණු වසන්කරන බව නවතම විගණන වාර්තාව සඳහන් කර ඇතැයි ද ඔහු පවසයි.
මෙම කාලසීමාවේදී සෞඛ්‍ය අමාත්‍යාංශයේ නිලතල දැරූ වර්තමාන සෞඛ්‍ය ලේකම් අනිල් ජාසිංහ සහ වෛද්‍ය අසේල ගුණවර්ධන ඇතුළු සෞඛ්‍ය අධ්‍යක්ෂ ජනරාල්වරුන් මේ ආකාරයට තොරතුරු ලබා නොදීසිටීම හරහා පසුගිය කාලසීමාවේදි සිදු වූ බොහෝ දූෂණ යටපත් වියහැකි බවද ඔහු පෙන්වා දෙයි.
ශ්‍රී ලංකා ක්‍රිකට් ආයතනය සහ විදේශ ඒවා නියුක්ති කාර්යාංශය මඟින් ඖෂධ මිලදී ගැනීම සඳහා පරිත්‍යාග කළ රුපියල් මිලියන 900කට ආසන්න මුදලක් අවභාවිත වී ඇති බවට විගණනය මඟින් පෙන්වාදෙන කරුණ සම්බන්ධයෙන් විමර්ශනයක් සිදුකරන ලෙස ද ඔහු ඉල්ලා ඇත.