ශ්‍රී ලංකාව සමග පැවැත්වෙන තරග දෙකකින් සමන්විත ටෙස්ට් තරගාවලිය සඳහා නවසීලන්ත ක්‍රිකට් කණ්ඩායම අද පෙරවරුවේ ශ්‍රී ලංකාවට පැමිණියා.
අයිසීසී ටෙස්ට් ශූරතාවලියට අයත් මෙම ටෙස්ට් තරගාවලිය සැප්තැම්බර් මස 18වනදා ගාල්ල ජාත්‍යන්තර ක්‍රිකට් ක්‍රීඩාංගණයේදී ආරම්භ වනවා.
මේ මස 21 වැනිදා පැවැත්වෙන ජනාධිපතිවරණ ඡන්ද විමසුම වෙනුවෙන් 21 වැනිදා නිවාඩු දිනයක් ලෙසට ප්‍රකාශයට පත්කර තිබෙනවා.
පළමු ටෙස්ට් තරගය අතරතුරදී ලබාදෙන විවේක දිනයේදී ශ්‍රී ලංකා පිලේ ක්‍රීඩකයින්ට තම ගම්බිම් බලා ගොස් ඡන්දය ප්‍රකාශ කර එදින පස්වරුවේම යළි කණ්ඩායම සමග එක්වන ලෙසටයි දැනුම් දී තිබෙන්නේ.
ඒ අනුව දෙපිල අතර පැවැත්වෙන පළමු ටෙස්ට් තරගයට දින 6ක් වෙන් කර දී තිබෙනවා.
දෙවැනි ටෙස්ට් තරගය මේ මස 26 දා සිට 30දා දක්වා පැවැත්වීමට නියමිතයි.
ශ්‍රී ලංකාව සහ නවසීලන්තය අවසන් වරට ශ්‍රී ලංකාවේදී හමුවුණේ 2019 වසරේදීයි.
ඒ එස්එස්සී හා ගාල්ල පිටියේ පැවැති ටෙස්ට් තරග දෙකේදී.
එහිදී තරගාවලිය 1-1ක් ලෙස සම තත්ත්වයෙන් නිමාවට පත්වුණා.
පසුගිය වසරේ නවසීලන්තයේදී තරග 2කින් සමන්විත ටෙස්ට් තරගාවලිය 2-0ක් ලෙස නවසීලන්තය ජය ගැනීමට සමත්වුණා.
මෙතෙක් දෙරට අතර, ටෙස්ට් තරග 39කදී නවසීලන්තය තරග 18ක් ජයගනිද්දී ශ්‍රී ලංකාව තරග 9ක් ජය වාර්තා කළා.
ටෙස්ට් තරග 11ක් ජය පරාජයෙන් තොරව නිමාවට පත්ව තිබෙනවා.