ජාත්‍යන්තර ක්‍රිකට් කවුන්සිලයේ මීළඟ සභාපතිවරයා ලෙස ඉන්දීය ක්‍රිකට් ලේකම් ජේ ෂා මහතා ඊයේ (28) නිතරගයෙන් තේරී පත් වුණා.
35 හැවිරිදි ජේ ෂා මහතා ලබන දෙසැම්බර් මස 1වැනිදා සිට ඩුබායිහි පිහිටි අයිසීසී මූලස්ථානයේ වැඩ භාර ගැනීමට නියමිත අතර, එලෙස පත්වූ ළාබාලතම අයිසීසී සභාපතිවරයා ලෙස ඉතිහාසගත වනවා.
ඒ මහතාගේ අයිසීසී පත්වීම තුළින් ලෝක ක්‍රිකට් ක්‍රීඩාවේදී ඉන්දියාවට තවත් බලයක් ලැබී තිබෙනවා.
දෙවරක් අයිසීසී සභාපති බවට පත්වූ නවසීලන්ත ජාතික ග්‍රෙග් බාර්ක්ලේ මහතාගේ කාලය ලබන දෙසැම්බර් මාසයේදී අවසන් වන බැවින් සභාපති තනතුර සඳහා නාමයෝජනා කැඳවූ මොහොතේ ජේ ෂා මහතාට ඉඩ ලබා දෙමින් වෙනත් කිසිවකු ඒ සඳහා ඉදිරිපත් වූයේ නැහැ.
2019 වසරේ සිට ඉන්දීය ක්‍රිකට් පාලක මණ්ඩලයේ ලේකම්වරයා වූ ජේ ෂා මහතා අයිසීසී සභාපතිවරයා ලෙස පත්වීමත් සමග මාධ්‍ය අමතා ටෙස්ට් ක්‍රිකට්වල වැදගත්කම අවධාරණය කරමින්, ගෝලීය ක්‍රිකට් සඳහා ඔහුගේ ඇති දැක්ම පිළිබඳව නිර්භීත ප්‍රකාශයක් කළා.
“ක්‍රිකට් ක්‍රීඩාව වේගයෙන් ඉදිරියට ගලා යනවා. ෆ්‍රැන්චයිස් ලීග් ජාත්‍යන්තර ක්‍රීඩාවට, විශේෂයෙන් ටෙස්ට් ක්‍රිකට්වලට තර්ජනය කරනවා. ටෙස්ට් ක්‍රිකට් ප්‍රවර්ධනය කිරීම අපේ විශාල වගකීමක්. ක්‍රිකට් ක්‍රීඩාව වෙන කවරදාටත් වඩා ජනප්‍රිය කිරීම මගේ අරමුණයි” ජේ ෂා මහතා පැවසුවා.
ජේ ෂා මහතාගේ යෝජනාවක් අනුව මෑතකදී ටෙස්ට් ක්‍රිකට් සඳහා ඉන්දීය ක්‍රීඩකයන්ට විශාල මුදල් දිරිගැන්වීම් ලබා දී තිබීම ද විශේෂත්වයකි.
ටෙස්ට් ක්‍රිකට් ක්‍රීඩාව ආරක්ෂා කරන විසඳුමක් ඉදිරිපත් කිරීම ඔහුගේ විශිෂ්ටතම සේවාවෙන් කොටසක් වනු ඇතැයි දැනටමත් අනාවැකි පළවෙමින් තිබීම විශේෂත්වයකි.
එමෙන්ම ඔහුගේ නව කැපවීම 2028 ඔලිම්පික් උලෙළේදී ආරම්භ වීමට නියමිත ක්‍රිකට් ක්‍රීඩාව සමඟ විශාල පරිවර්තනයක් වනු ඇති බව පැවසෙනවා.
2028 වසරේ ලොස් ඇන්ජලීස් ක්‍රීඩා උලෙළට වසර 128කදී නොපැමිණි ක්‍රිකට් ඔලිම්පික් වෙත පැමිණීම දැකගත හැකිවනවා.
ලොව ධනවත්ම ක්‍රිකට් ආයතනය බවට පත් වෙමින් ඉන්දීය ක්‍රිකට් පාලක මණ්ඩලය 2023 වසරේ ඉන්දීය රුපියල් කෝටි 5120කට (ශ්‍රී ලංකා රුපියල් කෝටි 18282ක්) අධික මුදලක් උපයාගත් අතර, එහි ගෞරවය ද ජේ ෂා වෙත හිමිවනවා.