වෙඩි තබා පුද්ගලයෙකු ඝාතනය කිරීමේ සිද්ධියක් සම්බන්ධයෙන් පුද්ගලයින් හය දෙනෙකු ශ්‍රී පුර ප්‍රදේශයේදී අත්අඩංගුවට ගෙන තිබෙනවා.
පොලීසිය පැවසුවේ, ගැමුණුපුර පුල්ලේයාර් හන්දිය ප්‍රදේශයේදී යතුරුපැදියකින් පැමිණ නාඳුනන පුද්ගලයින් දෙදෙනෙකු විසින් වෙඩිතබා එම ඝාතනය සිදුකර තිබූ බවයි.
එම ඝාතනය ඩුබායි රාජ්‍යයේ සිටින සංවිධානාත්මක අපරාධ කල්ලි සාමාජිකයෙකු වන පාතාල ප්‍රියන්ත නොහොත් ගුණසිරි ප්‍රියන්ත යන පුද්ගලයා විසින් මෙහෙයවා ඇති බව මූලික විමර්ශනවලදී අනාවරණය වී තිබෙනවා.
කෙසේවෙතත් මියගිය පුද්ගලයා ඝාතනය කිරීමට සැලසුම් කළ පුද්ගලයා නොවන බවට සැකකරුවන්ගෙන් සිදුකළ ප්‍රශ්නකිරීම්වලදී අනාවරණය වී ඇති බව පොලීසිය පැවසුවා.
අත්අඩංගුවට ගෙන ඇත්තේ 20,22, 38, 40 හා 47 යන වයස් සීමාවල පසුවන වැලිඔය, පදවිය, කැබතිගොල්ලෑව හා පරාක්‍රමපුර ප්‍රදේශවල පදිංචිකරුවන් බව සඳහන් වනවා.