සෙරන්ඩිබ් ෆ්ලාර් මිල්ස් (පුද්) සමාගම ශ්‍රී ලංකාවේ ප්‍රමුඛතම ආහාර, ඇසුරුම් හා කෘෂිව්‍යපාර ප්‍රදර්ශනය වන Profood Propack & AgBiz 2025 සඳහා සහභාගී වූයේ සුවිශේෂී අත්දැකීම් රැසක් ද සමඟිනි. ප්‍රදර්ශනය අගෝස්තු 22 සිට 24 දක්වා කොළඹ BMICH පරිශ්‍රයේදී පැවැත්විණ. ලාංකික ආහාර නිෂ්පාදන ක්ෂේත්‍රයට කවදත් ගුණාත්මක, නව නිපැයුම් හඳුන්වා දෙමින් ‘දේශය පෝෂණය කිරීමේ’ උදාර අරමුණ වෙනුවෙන් සෙරන්ඩිබ් ෆ්ලාර් මිල්ස් ගෙන යන නොසැලෙන මෙහෙවරෙහි තවත් සුවිශේෂී පියවරක් Profood Propack & AgBiz 2025 ප්‍රදර්ශනයේදී දැකගත හැකි විය.
ක්ෂේත්‍රයේ සෙසු තරගකාරී සන්නාම, නවෝත්පාදකයන් හා පාරිභෝගිකයන් විශාල පිරිසක් සහභාගී වූ මෙම වැඩසටහනේදී, විවිධත්වයෙන් යුතු සෙරන්ඩිබ් ෆ්ලාර් මිල්ස් නිෂ්පාදන පෙළ ප්‍රදර්ශනය කෙරුණු අතර, බොහෝ දෙනාගේ අවදානය යොමු වූ ප්‍රදර්ශන කුටියක් වූයේ ද සෙරන්ඩිබ් ෆ්ලාර් මිල්ස් කුටියයි. එපමණක් නොව, මෙම ප්‍රදර්ශනය තුළින් සමාගමට පාරිභෝගිකයන් හා ක්ෂේත්‍රයේ හවුල්කාර පාර්ශව සමඟ ඍජුව සම්බන්ධ වීමට අගනා අවස්ථාවක් ද නිර්මාණය කළේය. සෙරන්ඩිබ් ෆ්ලාර් මිල්ස් නිෂ්පාදනවල ගුණාත්මක බව හා ලාංකික ආහාර නිෂ්පාදන ක්ෂේත්‍රයේ වර්ධනයට ලබා දෙන දායකත්වය විදහා පාන්නට ද මෙය මහඟු අවස්ථාවක් විය.
සෙරන්ඩිබ් ෆ්ලාර් මිල්ස් මෙම ප්‍රදර්ශනයට සහභාගී වීමේ එක් ප්‍රධානතම අරමුණක් වූයේ, සමාගම මෑතකදී වෙළඳපොලට හඳුන්වා දුන් නව සිල්ලර ඇසුරුම් පෙළ සඳහා ප්‍රචාරණයක් ලබා දීමයි. ඒ අනුව සුවිශේෂී මිල ගණන් යටතේ සුපුරුදු පාරිභෝගිකයන්ට මෙම නිෂ්පාදන මිලදී ගැනීමේ අවස්ථාව හිමි වූ අතර, නව පාරිභෝගික පිරිසක් ආකර්ෂණය කරගැනීමට ද මේ තුළින් අවස්ථාව උදා විය. එමෙන්ම, ප්‍රවීණ සූපවේදී දුෂ්‍යන්ති මදනායක විසින් මෙහෙයවනු ලැබූ සජීවී බේකිං අත්දැකීම විඳගැනීමට ද පැමිණි පිරිසට හැකි විය. සමාගමේ ප්‍රමුඛතම 7 Star නිෂ්පාදනවල ගුණාත්මක බව සහ විවිධ අයුරින් භාවිත කිරීමේ හැකියාව ද මෙහිදී විශේෂයෙන් පෙන්වා දෙනු ලැබීය.
නැවුම් බේකිං නිෂ්පාදන රස බැලීමටත්, අදහස් බෙදාහදා ගැනීමටත් ඉඩකඩ විවර වී තිබූ නිසා, සෙරන්ඩිබ් ෆ්ලාර් මිල්ස් ප්‍රදර්ශන කුටිය පැමිණි කාහටත් සැබැවින්ම අපූරු රසවත් අත්දැකීමක් තිළිණ කළ තැනක් විය.
සෙරන්ඩිබ් ෆ්ලාර් මිල්ස් සමාගමට මෙම ප්‍රදර්ශනයේදී ප්‍රධාන වශයෙන්ම බේකරි, ආහාර නිෂ්පාදන හා තිරිඟු පිටි ආශ්‍රිත විවිධ නිෂ්පාදන සඳහා යොමු වූ ආයතනික ගැනුම්කරුවන් සමඟ ඍජුව සම්බන්ධ වීමට අවස්ථාව උදා විය. සමාගම විසින් හඳුන්වා දී ඇති පුළුල් පරාසයක විහිදුණු නිපැයුම් පෙළේ ඇති විශේෂතා අතර, නිෂ්පාදනවල බහුකාර්ය බව, නොවෙනස් ගුණාත්මක බව හා විවිධ නිෂ්පාදන සඳහා භාවිත කිරීමේ හැකියාව යන ලක්ෂණ කැපී පෙනේ. වෘත්තීය බේකිං හා ආහාර නිෂ්පාදන ක්ෂේත්‍රයේ විශ්වසනීය හවුල්කරුවෙකු ලෙස සෙරන්ඩිබ් ෆ්ලාර් මිල්ස් දිනා ඇති ස්ථානය නැවතත් තහවුරු කරන්නට ද මෙම ප්‍රදර්ශනය ඉවහල් වූ බව සඳහන් කළ හැකිය.
කර්මාන්ත අමාත්‍යංශය, ජාතික කෘෂිව්‍යාපාර සභාව හා ශ්‍රී ලංකා ආහාර විද්‍යා හා තාක්ෂණ ආයතනයේ (IFSTSL) මඟපෙන්වීම යටතේ පැවති, Profood Propack & Agbiz 2025 ප්‍රදර්ශනය, ශ්‍රී ලංකා ආහාර සැකසුම්කරුවන්ගේ සංගමය (SLFPA) විසින් සංවිධාන කරනු ලැබූ අතර, මේ සඳහා ලංකා ප්‍රදර්ශන හා සම්මේලන සේවයේ (LECS) හවුල්කාරීත්වය ද මේ සඳහා හිමි වී තිබිණි. සමස්තයක් වශයෙන් ගත් කළ, ශ්‍රී ලාංකික ආහාර නිෂ්පාදන ක්ෂේත්‍රයේ අඛණ්ඩ වර්ධනය උදෙසා සුවිසල් දායකත්වයක් ලබා දුන් වැඩසටහනක් ලෙස Profood Propack & Agbiz 2025 ප්‍රදර්ශනය අවිවාදයෙන්ම හඳුන්වා දිය හැකිය.