BYD විදුලි වාහන සම්බන්ධයෙන් ඇති වී තිබෙනා අර්බුදය ගැන එම වාහන ආනයනය කරනා ජෝන් කීල්ස් සී.ජී. ඔටෝ (JKCG) සමාගම නිළ ප්‍රකාශයක් නිකුත් කර ඇත. ඒ අනුව දැනට අධිකරණය හමුවේ එකි වාහන රේගු භාරයේ රඳවා ගැනීම අත් හිටවන ලෙස ඉල්ලා පවරා ඇති නඩුව විභාගවී අවසාන වනතෙක් නව වාහන සඳහා ඇනවුම් බාරගැනිම අත්හිටවීමට සමාගම තීරණය කර ඇත.
මේ වනවිටත් රඳවාගෙන ඇති විද්‍යුත් වාහන (EV) මුදා ගැනීමට අතුරු සහනයක් අධිකරණයෙන් ඉල්ලා ඇති බව එම නිවේදනය පවසයි . තවද අසාධාරණ ලෙස රඳවාගෙන ඇති ඉතිරි වාහන තොග නිෂ්කාශනය කිරීම සඳහා ශ්‍රී ලංකා රේගුව සමඟ සාකච්ඡා කරමින් සිටින බව සමාගම සඳහන් කරයි.
මේ අතර, රේගුව විසින් පත් කරන ලද අදාළ කමිටුවක් තාක්ෂණික කරුණු සලකා බැලීමට අපේක්ෂා කරන බව සඳහන් කරන JKCG සමාගම, වාහනවල මෝටර් ධාරිතාවේ නිමැවුම පිළිබඳ ඕනෑම සැකයක් තහවුරු කිරීමට සහ ඉවත් කිරීමට උපකාරී වන පරිදි, තෝරාගත් වාහන මාදිලි ජාත්‍යන්තරව පිළිගත් ස්වාධීන මෝටර් රථ රසායනාගාරයකදී පරීක්ෂාවට ලක් කිරීමට ඇති කැමැත්ත නැවත අවධාරණය කරයි. මෙවැනි පරීක්ෂණයක් මගින් නිරවද්‍යතාවය, විශ්වසනීයත්වය සහ ස්ථාවරත්වය සහතික කරගත හැකිවනු ඇතැයි සමාගම පෙන්වා දෙයි.
මෙම ගැටලුව අපේක්ෂිත කාලයට වඩා වැඩි කාලයක් ගත වීම නිසා විද්‍යුත් වාහන (EV) මාදිලිවල බෙදාහැරීමේ ස්ථිර කාලසීමාවක් ලබා දීමට නොහැකි වී ඇති බව JKCG සිය පාරිභෝගිකයින්ට දැනුම් දෙයි. මේ හේතුවෙන්, පාරිභෝගිකයින් සඳහා විකල්ප තුනක් සමාගම විසින් ඉදිරිපත් කර ඇත.
BYD SEALION 6 ප්ලග්-ඉන් හයිබ්‍රිඩ් වාහනයක් වෙත විශේෂ වට්ටමක් සහිතව මාරු වීම (ඔක්තෝබර් 10 වනදාට පෙර තහවුරු කළහොත්).
ඔවුන් විසින් ගෙවා ඇති මුදල් පොලී සමඟ ආපසු ලබා ගැනීම (ඔක්තෝබර් 10 වනදාට පෙර).
රේගු තීරණය හෝ බදු නිර්ණය කිරීම අවසන් වන තෙක් තමන්ගේ ඇණවුම පවත්වාගෙන යෑම.
තවද, විද්‍යුත් වාහන (EV) සඳහා ඇණවුම් භාර ගැනීම දිගටම සිදු කරන නමුත්, ගැටලුව විසඳෙන තුරු වාරික ගෙවීම් (down payments) ඉල්ලා නොසිටීමට සමාගම තීරණය කර ඇත.
ජෝන් කීල්ස් සී.ජී. ඔටෝ සමාගම අවධාරණය කරන්නේ, දැනට සිටින විද්‍යුත් වාහන (EV) සහ ප්ලග්-ඉන් හයිබ්‍රිඩ් විද්‍යුත් වාහන (PHEV) පාරිභෝගිකයින් සඳහා වන වගකීම් (warranties), අමතර කොටස් සහ අදාළ සේවා සඳහා BYD සහ JKCG වෙතින් සම්පූර්ණ සහය අඛණ්ඩව ලැබෙන බවයි.
