ටයිටන් නමින් හඳුන්වන කුඩා වර්ගයේ සබ්මැරීනයකින් ටයිටැනික් නෞකාවේ නටඹුන් නැරඹීමට ගොස් බ්‍රිතාන්‍ය ජාතික කෝටිපතියකු ඇතුළු පුද්ගලයන් පස්දෙනකුට ජීවිත අහිමි වුණා.
එම ඛේදවාචකයෙන් වසරකට පසු අමෙරිකාවේ ප්‍රබල කෝටිපතියකු මේ වන විට ටයිටැනික් නැවේ නටඹුන් ගවේෂණය කිරීමේ චාරිකාවක නිරතවීමට සූදානමින් සිටින බව විදෙස් මාධ්‍ය වාර්තා කරනවා.
අමෙරිකාවේ දේපළ වෙළෙඳ සමාගමක හිමිකරුවකු වන 74වන වියේ පසුවන ලැරී කෝනර් සහ ඔහුගේ සහායක පැට්‍රික් ලාහේ එම චාරිකාවට එක්වීමට කටයුතු කරමින් සිටින බව එම වාර්තා සඳහන් කරනවා.
ඔහියෝ ප්‍රාන්ත වැසියකු වන මේ කෝටිපතියා පසුගිය වසරේ නටඹුන් නැරඹීමට ගොස් ජීවිතය අහිමි කරගත් ඕෂන්ගේට් සමාගමේ හිමිකරු වන ස්ටොක්ටන් රෂ් මෙන්ම ත්‍රාසජනක ක්‍රියාකාරකම්වලට ඇබ්බැහි වූවකු බව විදෙස් මාධ්‍ය සඳහන් කරනවා.
උතුරු අත්ලාන්තික් සයුරේ අඩි 12,000කට වඩා යට මුහුදු පතුලේ තැන්පත් වී ඇති ටයිටැනික් නැවේ නටඹුන් මෙන්ම පසුගිය වසරේදී මුහුද යටදී පිපිරී ගිය ටයිටන් සබ්මැරීනයේ සුන්බුන්ද ගවේෂණය කිරීම ලැරී කෝනර්ගේ අරමුණ වී තිබෙනවා.
ඔවුන්ගේ ගවේෂණ චාරිකාව සිදු කරන්නේ අමෙරිකානු ඩොලර් මිලියන 20ක් වැය කර තැනූ ට්‍රයිටොන් නමැති කුඩා වර්ගයේ සබ්මැරීනයකින්.
එම සබ්මැරීනයට අමෙරිකාවේ සාගර ගවේෂණ සහතිකය ලැබීමෙන් පසු චාරිකාව ආරම්භ කරන බව එහි සඳහන් වනවා.
පෞද්ගලික ගගනගාමියකු ලෙස නාසා ආයතනයේ සහතිකලත් මේ කෝටිපතියා මීට පෙර අභ්‍යවකාශ නැවතුම් මධ්‍යස්ථානයට ද ගොස් ඇති අතර, පැසිෆික් සයුරේ අඩි 20,000ක් ගැඹුරට කිමිදීමට සමත්වූ පුද්ගලක් බව විදෙස් වාර්තා පවසනවා.
එසේම එම පුද්ගලයා මෝටර් රථ තරගවලට ද ඉදිරිපත් වී ඇති බව සඳහන් වනවා.