වෝල්ට් ඩිස්නි “Walt Disney” චිත්‍රපට නිෂ්පාදන ආයතනයේ Pixar Animation Studios හි සේවය කරමින් සිට ප්‍රධාන පෙළේ විධායක නිලධාරීන් දෙදෙනෙකු ඇතුළුව සේවකයින් 75 දෙනෙකු සේවාවෙන් ඉවත් කිරීමට එම ආයතනය තීරණය කර තිබේ.
“Lightyear” නැමැති චිත්‍රපටයෙන් බලාපොරොත්තු වූ බොක්ස් ඔෆිස් වාර්තා සිහිනය බොඳව යාමත් සමග මෙම සේවක කප්පාදුව සිදුකර ඇති බව විදෙස් මාධ්‍ය සඳහන් කරයි.
මෙලෙස ඉවත් කර ඇත්තේ “Lightyear” චිත්‍රපටයේ අධ්‍යක්ෂකවරයා සහ එහි නිෂ්පාදකවරයාය ඇතුළු 75 දෙනෙකුය.
වසර 26 ක සේවාකාලයක් ඇති “Walt Disney” චිත්‍රපට ආයතනය විසින් නිර්මාණය කළ “Toy Story 4” සහ “Coco” යන චිත්‍රපට සඳහා ද දායකත්වය ලබා දුන් Angus MacLane නැමැති අධ්‍යක්ෂකවරයා මෙන්ම, 1995 සිට මෙම ආයතනයේ සේවය කල “Toy Story” චිත්‍රපටයේ සිටම එම කතා මාලාවේ කටයුතු කර ඇති Galyn Susman නැමැති නිෂ්පාදකවරයා ද ඉවත් කළ සේවකයින් අතර සිටියි.
කෙසේ වෙතත් මීට පෙර දිනයකදී Walt Disney ආයතනයේ ප්‍රධාන විධායක නිලධාරිවරයා වන බොබ් අයිගර් (Bob Iger) පවසා ඇත්තේ ආයතනයේ පිරිවැය ඩොලර් බිලියන 5.5ක් කප්පාදු කිරීමට අවශ්‍ය වන බැවින් ඒ සඳහා සේවකයින් 7,000ක් ඉවත් කිරීමට සිදුවන බවය.