අමෙරිකාවේ නිව්යෝර්ක් නගරයට ත්‍රස්ත ප්‍රහාරයක් එල්ල කිරීමට සැලසුම් කළ කැනඩාවේ වාසය කරන 20 හැවිරිදි මුහම්මඩ් ඛාන් නම් පාකිස්තාන ජාතික තරුණයෙකු අත්අඩංගුවට ගෙන ඇති බව එරට මාධ්‍ය වාර්තා කරනවා.
බෘක්ලීන්හි යුදෙව් ජාතිකයින් ඉලක්ක කරමින් සමූහ වෙඩි තැබීමක් සිදු කිරීම මෙම තරුණයාගේ සැලසුම වී තිබූ බවයි මේ වන විට අනාවරණ වී ඇත්තේ.
ඒ IS සංවිධානයට සහාය පළ කිරීමක් වශයෙන් බව එරට මාධ්‍ය පවසනවා.
ගාසා තීරයේ හමාස් සංවිධානය ඊශ්‍රායලයට කඩා වැදී ප්‍රහාර එල්ල කිරීමට වසරක් සැපිරෙන ඔක්තෝබර් 7 වනදා සමූහ වෙඩිතැබීම දියත් කිරීම චූදිත තරුණයාගේ සැලසුම වී තිබෙනවා.
සිය සහචරියන් රහසිගත නියෝජිතයින් බව නොදැන මෙම තරුණයා ප්‍රහාරය සැලසුම් කර තිබුණේ රහසිගත විමර්ශකයින් දෙදෙනෙකු සමග එක්වනවා.
මුහම්මඩ් ඛාන් ප්‍රහාරය සඳහා අවි සපයා ගැනීම භාරදී තිබුණේ මෙම රහසිගත නියෝජිතයින්ට වන අතර යුදෙව් ජාතිකයින් බහුතරයක් වාසය කිරීම බෘක්ලීන් ඉලක්ක කිරීමට හේතුව වී තිබුණා.
ඒ අනුව මිනිස් ජාවාරම්කරුවෙකු මාර්ගයෙන් සැප්තැම්බර් 4 වනදා විවිධ මෝටර් රථ තුනක් භාවිතයෙන් කැනේඩියානු දේශසීමාව හරහා අමෙරිකාවට ඇතුළු වීමට උත්සාහ කිරීමේ දී ඔහුව අත්අඩංගුවට ගෙන ඇති බව වාර්තා වෙයි.
අමෙරිකානු මධ්‍යම විමර්ශන කාර්යාංශයේ සහ රාජකීය කැනේඩියානු පොලීසියේ සහයෝගිත්වයෙන් වැඩිදුර විමර්ශන ක්‍රියාත්මකයි.