ආසියානු මීටර් 800 රන් පදක්කම් දිනූ ඔලිම්පික් ක්‍රීඩිකා තරුෂි කරුණාරත්න ක්‍රීඩා පුහුණුවට හා කළමනාකරණ උපාධිය හැදෑරීම සඳහා අද (31) අමෙරිකාව බලා පිටත්ව යනවා.
ඇය ලුසියානා ප්‍රාන්තයේ නිව් ඔරලෙන්ස්හි පිහිටි තුලේන් විශ්වවිද්‍යාලයට ලබන සතියේ ඇතුළත් වන අතර, ඒ සඳහා ඇයට වසර 4ක පූර්ණ ශිෂ්‍යත්වයක් ලැබී තිබෙනවා.
තුලේන් විශ්වවිද්‍යාලය සතුව තුලේන් ග්‍රීන් වේව් නමින් මලල ක්‍රීඩා කණ්ඩායමක් ඇති අතර, තරුෂි ඉදිරියේදී එම කණ්ඩායම නියෝජනය කරනවා.
එම තුලේන් ග්‍රීන් වේව් මලල ක්‍රීඩා කණ්ඩායම අමෙරිකානු මලල ක්‍රීඩා සම්මේලනයේ සාමාජිකයකු ලෙස ප්‍රමුඛ පෙළ තරගාවලි නියෝජනය කරනු ලබනවා.
තුලේන් ග්‍රීන් වේව් යටතේ පාපන්දු, බාස්කට්බෝල්, වොලිබෝල් හා බේස්බෝල් වැනි ක්‍රීඩා සංචිත ක්‍රියාත්මකවන අතර, ක්‍රීඩා සංකීර්ණයක් වෙනම පිහිටා තිබෙනවා.
තරුෂිට විශ්වවිද්‍යාල කිහිපයකින්ම ශිෂ්‍යත්ව ලැබී ඇති අතර, ක්‍රීඩාව හා අධ්‍යාපනය යන අංශ දෙකම කළ හැකි ස්ථානයක් තෝරාගත් බව තරුෂි කරුණාරත්න පවසා ඇත්තේ.
එම අමෙරිකා තුලේන් විශ්වවිද්‍යාලයේ ක්‍රීඩා පුහුණුවීම් සඳහා අවශ්‍ය පහසුකම් ඇති හෙයින් එය වඩාත් සුදුසුම ස්ථානය බව ඇය පවසා තිබෙනවා.
මෙවර පැරිස් ඔලිම්පික් ක්‍රිඩා උලෙළේ මීටර් 800 මූලික වටයේ තරගයට එක්වූ තරුෂි කරුණාරත්න මිනිත්තු 2:07.76කින් තරගය නිමකොට අවසන් පූර්ව වටයට ඍජුව සුදුසුකම් ලබා නොගත් හෙයින් යළි ‘රිපිචේජ් වටයේදී’ මිනිත්තු 2:06.66ක කාලයක් ගත කළා.
ආසියානු රන් පදක්කම් දිනූ තරුෂි කරුණාරත්නගේ පැරිස් ඔලිම්පික් ධාවනය ලොව අතිදක්ෂ ක්‍රීඩිකාවන් අතුරින් එලෙස නිමාවට පත් වූවා.