ශ්රී ලංකා පොදුජන පෙරමුණේ පාර්ලිමේන්තු මන්ත්රී ඩී.වී. චානක පාර්ලිමේන්තුවේ අද පැවති අයවැය විවාදයට එක්වෙමින් ආන්දෝලනාත්මක ඩබල් කැබ් රථ මිලට ගැනීමේ ටෙන්ඩරය ගැන අදහස් දැක්වීය .
බිලියන 60 ක ඩබල් කැබ් රථ ටෙන්ඩරය අන්ත දූෂිත ටෙන්ඩරයක් බවත්, එය කෙලින්ම ඩීල් එකක් බවත්, ජාත්යන්තර ටෙන්ඩරයක් සඳහා දින 42ක් ගතවිය යුතු වුවද, මෙම ටෙන්ඩරය දින 12ක් දක්වා අඩු කර ඇති බවත් ඔහු පැවසීය .
සාමාන්ය ප්රසම්පාදන පිළිවෙලට අනුව රුපියල් ලක්ෂ 10 ක ටෙන්ඩරයකට වුවද පූර්ව-ලංසු රැස්වීමක් පවත්වන මුත්, බිලියන 60ක මෙම ටෙන්ඩරය සඳහා එවැන්නක් නොතිබූ බවද ඔහු පැවසූවේය .
මෙම ටෙන්ඩරය සකස් කර ඇත්තේ ලංකාවේ එක් සමාගමකට පමණක් ලංසු තැබීමට හැකි වන ආකාරයට බව මන්ත්රීවරයා පෙන්වාදුන්නේය . පිරිවිතරයන්ට අනුව, එන්ජින් ධාරිතාව (CC) 2500ත් 3000ත් අතර විය යුතු අතර, රට වටා කොළඹට අමතරව තවත් සේවා ස්ථාන තුනක් හෝ පහක් තිබිය යුතු විය.
ලංකාවේ සමාගම් පහක් සහ ජාත්යන්තර සමාගම් පහක් මෙම ටෙන්ඩරය සඳහා ඉදිරිපත් වූ අතර, ටොයෝටා හැර අන් සියල්ලන්ම ප්රතික්ෂේප විය. ප්රතික්ෂේප වූ සමාගම්වලට 2500cc–3000cc පරාසයේ එන්ජින් ධාරිතාවක් නොතිබීම හෝ අවශ්ය සේවා ස්ථාන පහ නොතිබීම ඊට හේතු විය.
ලංකාවේ සේවා ස්ථාන පහක් ඇත්තේ ටොයෝටා සමාගමට පමණක් බව පෙන්වාදුන් ඔහු. ඩබල් කැබ් රථ මිලදී ගැනීම එතරම් හදිසි වූයේ ඇයිදැයි ප්රශ්න කළේය. ඔහු වැඩිදුරටත් කියා සිටියේ, මෙම තත්ත්වය අනුව ටෙන්ඩරයක් නොදමා කෙලින්ම ටොයෝටා සමාගමට ඩබල් කැබ් ඇණවුම ලබා දුන්නේ නම් හොඳ බවයි.