”ආණ්ඩුවේ පොරොන්දු හතරක් මත වර් ජනය ඇත හැරියා” කියයි

තම සංගමය විසින් දියත් කිරීමට නියමිතව සූදානම සිටි අඛණ්ඩ වැඩ වර්ජනය ජනාධිපති ලේකම්වරයා විසින් ලබාදුන් ලිඛිත එකඟතාවයන් කිහිපයක් මත අත්හිටුවීමට තීරණය කරන ලද බව රජයේ වෛද්‍ය නිලධාරීන්ගේ සංගමය සඳහන් කරයි. ඒ අනුව දැනට ක්‍රියාත්මක වැඩ වර්ජනය හෙට උදෑසන 8.00 තාවකාලිකව අත්හිටුවන බව එම සංගමය නිවේදනය කරයි.

පසුගිය සිකුරාදා දින පැවති රජයේ වෛද්‍ය නිලධාරීන්ගේ සංගමයේ විශේෂ හදිසි මධ්‍යම කාරක සභාවේදි තීරණය කළ පරිදි රජයේ බදු ප්‍රතිපත්තියට එරෙහිව වෘත්තීය සමිති ක්‍රියාමාර්ග පසුගිය සදුදා දින සිට ආරම්භ විය. ඒ අනුව සඳුදා දින දිවයිනේ පළාත් 4කත්, අඟහරුවාදා එනම්, ඊයේ දිනයේදී සෙසු පලාත් 5 ත් ක්‍රියාත්මක වූ වෛද්‍ය වැඩවර්ජනය අද දින උදෑසන 8.00 සිට දිවයිනේ පළාත් 9 ම ආවරණය වන දීප ව්‍යාප්ත වැඩවර්ජන ක්‍රියාමාර්ගයක් දක්වා ව්‍යප්ත කිරීමට සිදු විය.

වර්ජනය පවතින අතර තුර ජනාධිපතිවරයාගේ උපදෙස් මත ජනාධිපති ලේකම්වරයා විසින් අප ඉදිරිපත් කළ කරුණු පිළිබඳ ඔවුන්ගේ ස්ථාවරය අප වෙත ලිඛිතව ඉදිරිපත් කර ඇත.

අදාල ලේඛණයට අනුව,

අප ඇතුලුව වෘත්තිය සමිති ව්‍යාපාරය විසින් ඉදිරිපත් කර ඇති බදු සංශෝධන පිළිබඳ විකල්ප යෝජනා අඛණ්ඩව සාකච්ඡාවට බඳුන් කිරීමට රජයේ ඇති අභිලාශය ප්‍රකාශයට පත් වී ඇත.

ජාත්‍යන්තර මුල්‍ය අරමුදල සමඟ රජය අත්සන් කර ඇති ගිවිසුම 2023.03.20 වැනි දින සිට ආරම්භ වන බව ප්‍රකාශයට පත් කර ඇත. ඉන් අනතුරුව එළඹෙන ආසන්නතම පළමු සමාලෝචන අවස්ථාවේදිම අප විසින් ඉදිරිපත් කර ඇති බදු සංශෝධන ක්‍රියාත්මක කිරීම සඳහා සලකා බැලීමට රජයේ ඇති කැමැත්ත දක්වා ඇත.

බදු සංශෝධන සම්බන්ධයෙන් ජාත්‍යන්තර මුල්‍ය අරමුදල සමඟ ඍජු ලෙස සාකච්ඡා කිරීමට වෘත්තීය සමිති සඳහා අවස්ථාවක් ලබා දීමට එකඟතාව පල වී ඇත.

රාජ්‍ය මූල්‍ය ප්‍රවණතාවයන් සැලකිල්ලට ගනිමින් රජයේ සේවකයන් වෙත 2023 අග කාර්තුවේදී විශේෂ දීමනාවක් ලබා දීමට ඇති ඉඩකඩ පිළිබඳ කරුණු දක්වා ඇත.

සෞඛ්‍ය ක්ෂේත්‍රය තුල වෘත්තිය සමිති ක්‍රියාමාර්ග හරහා ජනතාවට වන අපහසුතාවයන් පිළිබඳ අමුතුවෙන් පැහැදිලි කළ යුතු නැත. එම සංවේදි කරුණ මෙන්ම සාමාජිකයන්ගේ අදහස්ද සමීපව සැලකිල්ලට ගනිමින් සිටි මොහොතක, ජනාධිපති ලේකම් කාර්යාලය විසින් අප වෙත යොමු කළ ලිපිය හරහා ලබා දී ඇති සංඥා පිළිබඳව ද අවධානය යොමු කළ රජයේ වෛද්‍ය නිලධාරීන්ගේ සංගමයේ විධායක සභාව, මේ වන විට ආරම්භ කර අඛණ්ඩව දියත් කිරීමට සැලසුම් කර තිබු වෘත්තීය සමිති ක්‍රියාමාර්ග හෙට දින උදෑසන 8.00 ට තාවකාලිකව අත්හිටුවීමට තීරණය කරන ලදී.

රජයේ වෛද්‍ය නිළධාරී සංගමයේ මාධ්‍ය නිවේදනයක් ඇසුරෙනි

Leave a Comment

ඔබගේ ඊමේල් ලිපිනය ප්‍රසිද්ධ කරන්නේ නැත. අත්‍යාවශ්‍යයය ක්ෂේත්‍ර සලකුණු කොට ඇත *