2024 IPL තරගාවලියේ ජයග්‍රහණය කොල්කටා නයිට් රයිඩර්ස් කණ්ඩායමට හිමි වුණා.
ඒ චෙන්නායිහි එම්. ඒ චිදම්බරම් අන්තර්ජාතික ක්‍රිකට් ක්‍රීඩාංගණයේ දී සන් රයිසස් හයිද්‍රාබාද් කණ්ඩායම ලබා දුන් ලකුණු 113ක ඉලක්කය පන්දුවාර 10.3ක දී කඩුලු 2ක් පමණක් දැවී පහසුවෙන් පසු කර යමින්.
කාසියේ වාසිය දිනාගනිමින් පළමුවෙන් ම පන්දුවට පහර දුන් සන්රයිසස් හයිද්‍රාබාද් කණ්ඩායම පන්දුවාර 18.3 අවසානයේ දී සියලු දෙනා දැවී ලකුණු 113ක් රැස් කර ගත්තේ, ඉන්දීය ප්‍රිමියර් ලීග් අවසන් මහා තරග ඉතිහාසයේ කණ්ඩායමක් වාර්තා කළ අඩුම ලකුණු සංඛාවට හිමි අවමන් සහගත වාර්තාව තමා ඉදිරියේ ලියා තබා ගනිමින්.
එම පහසු ඉලක්කය හඹා යාමට පිටියට පිවිසි කොල්කටා කණ්ඩායමේ ආරම්භක පිතිකරු සුනිල් නරේන් ලකුණු 6ක් පමණක් ලබා සිටිය දී හයිද්‍රාබාද් නායක පැට් කමින්ස්ගේ පන්දුවක් හමුවේ දැවී ගියා.
අනතුරුව කොල්කටා ආරම්භක පිතිකරු රහ්මනුල්ලා ගුර්බාස් හා පිටියේ ස්ථාවර වූ වෙන්කටේෂ් අයියර් පිටිය සිසාරා දැවැන්ත ප්‍රහාරාවලියක් එල්ල කළේ හයිද්‍රාබාදය වෙත ජයග්‍රහණය පිළිබඳව වූ අංශුමාත්‍රයක බලාපොරොත්තුව ද සුන්නද්දූලි කරමින්.