වසර ගණනාවක් ජාත්‍යන්තරයෙන් මුළු ගැන්වී සිටි ශ්‍රී ලංකාව ජාත්‍යන්තරය දිනා ගෙන මෙවර ජාතික නිදහස් දිනයේ 70 වැනි සංවත්සරය ‘එකම දැයක්’ යන තේමාව යටතේ අති උත්කර්ෂවත් ලෙස පවත්වන බව ස්වදේශ කටයුතු අමාත්‍ය වජිර අබේවර්ධන පවසයි.

ඔහු වැඩිදුරටත් කියා සිටියේ මෙවර ජාතික නිදහස් දිනයේ 70 වැනි සංවත්සරය වෙනුවෙන් රාජ්‍ය නායකයන් හා රාජ්‍ය ධූත පිරිස් විශාල පිරිසක් සහභාගී වීමෙන් ම ඒ බව තහවුරු වන බවයි.

මෙවර උත්සවයේ විශේෂ ආරාධිත අමුත්තකු ලෙස බ්‍රිතාන්‍ය රජ පවුල නියෝජනය කරමින් එලිසබෙත් මහ රැජිනගේ බාල පුත්‍රයා වූ එඩ්වර්ඩ් කුමරු සහභාගී වේ. ඔහු බ්‍රිතාන්‍යයේ බෙල්ෆර්සට් හි අර්ල්වරයා ලෙස කටයුතු කරනු ලැබේ. විදේශ කටයුතු අමාත්‍යාංශය මගින් බ්‍රිතාන්‍ය රජ පවුල වෙත කරනු ලැබූ ආරාධනයක් අනුව එඩ්වඩ් කුමරු පැමිණෙන බව සනාථ කර තිබේ.

මෙම නිදහස් සමරුව සදහා එයටම සුවිශේෂී වු ලාංඡනයක් ද හදුන්වා දීමට ස්වදේශ කටයුතු අමාත්‍යාංශය කටයුතු කර ඇත. නිදහසේ සංකේතයක් නිදහස් චතුරශ්‍රය හා 70 වසර මෙම ලාංඡනයේ දැක්වේ.

පෙබරවාරි 04 වැනි දින සන්ධ්‍යාවේ දී කලාකරුවන් රැසකගේ සහභාගීත්වයෙන් සංස්කෘතික සහ සංගීත ප්‍රසංගයක් කොළඹ නගරශාලා පරිශ්‍රයේදී පැවැත්වීමට නියමිතය.

පෙබරවාරි 04 වැනිදා නිදහස් දින උත්සවය පැවැත්වෙන අවස්ථාවේ දී හා ඒ සඳහා පෙරහුරු පැවැත්වෙන අවස්ථාවන් හි දී කොළඹ නගරයේ විශේෂ රථවාහන සැළැස්මක් ක්‍රියාත්මක කරනු ලබන බව ද ස්වදේශ කටයුතු අමාත්‍යාංශය සදහන් කළේය.

නිදහස් දින උත්සවය වෙනුවෙන් සෑම නිවසක ම ජාතික ධජය ඔසවන ලෙස ද අමාත්‍යාංශය ඉල්ලා සිටි.